Siońnia ŭ haradskim pasiołku Śvir Miadzielskaha rajona raźvitalisia z rabotnikam psichanieŭrałahičnaha doma-internata, 62-hadovym Viktaram Jancevičam. Jak kažuć jaho rodnyja, u daviedcy pra śmierć mužčyny staić karanavirusnaja infiekcyja. U susiedniaj vioscy Łuščyki taksama rychtujucca da pachavańnia. Učora ŭ balnicy pamior rabotnik doma-internata, 57-hadovy Piotr Vałyniec. Žonki Viktara Janceviča i Piatra Vałynca ŭ balnicy — jany taksama supracoŭnicy internata, paviedamlaje Tut.by.
Čytajcie taksama: «U nas u Śviry stolki pnieŭmanij!» Pamior 53-hadovy biznesmien
— U taty ŭ daviedcy pra śmierć staić COVID-19, mamu na pachavańnie nie puścili, jana ŭ balnicy, — płača na tym kancy provadu Volha, dačka pamierłaha Viktara Janceviča. Jaje baćki razam pracavali ŭ internacie. — Mnie da śloz škada dyrektara Rusaka Kazimira Miečysłavaviča. Jon zastaŭsia z chvorymi amal adzin, mnohija supracoŭniki zachvareli. Daj Boh jamu sił! Abaviazkova pajedu da Kazimira Miečysłavaviča paśla pachavańnia taty skazać dziakuj.
Śvirski psichanieŭrałahičny dom-internat znachodzicca ŭ Miadzielskim rajonie, jak kažuć miascovyja, a ŭ rehijonie dva asnoŭnyja miescy pracy — kałhas i internat. Niadziŭna, što ŭ internacie pracujuć cełymi siemjami.
Adzin z vałancioraŭ raspaviadaje Tut.by: jon šmat hadoŭ padtrymlivaje Śvirski internat, a ŭ sakaviku kinuŭ tudy pryjazdžać. U krainie stali fiksavać pieršyja vypadki karanavirusa, vyjšaŭ dakumient, pa jakim vałanciorskija pajezdki na čas prypynili.
— My dapamahajem i adpraŭlajem srodki indyvidualnaj abarony: procičumnyja kaściumy, maski, reśpiratary, akulary, bachiły, achoŭnyja ekrany, ciepłavizary. Jašče ŭ krasaviku bolš za 20 supracoŭnikaŭ internata byli špitalizavany ŭ balnicu z padazreńniem na dvuchbakovuju pnieŭmaniju. A na dniach zrabili testy na karanavirus — COVID-19 paćvierdziŭsia ŭ 18 čałaviek ź piersanału i 13 tych, chto pražyvaje, a ŭsiaho ŭ internacie bolš za 150 čałaviek [danyja pa kolkaści chvorych aficyjna nie paćvierdžanyja. — Zaŭv. Tut.by]. Samaje strašnaje ciapier: ludzi bajacca i pačynajuć zvalniacca, sychodzić u adpačynak za svoj košt. I tady pytańnie, chto pojdzie pracavać u internat, pryhladać i dahladać za asablivymi ludźmi, viedajučy pra ŭsiu situacyju?
Toje, što ŭ internacie ŭspyška zachvorvańnia, paćviardžajuć i miascovyja žychary ź vioski Kamarova i haradskoha pasiołka Śvir. U kahości ŭ balnicy lažyć svajak, u kahości — susied ci znajomy.
Viktar Jancevič byŭ špitalizavany razam z žonkaj. Jon pamior 12 maja, Viktaru Antonaviču było 62 hady.
— Zaraz u balnicy mnohija supracoŭniki internata, vuń susied taksama z žonkaj lažać, jon u reanimacyi. Sa 100 supracoŭnikaŭ mała chto zastaŭsia na pracy. Razumiejecie, spačatku ni ŭ kaho nie brali testy na karanavirus, usie išli na pracu ŭ internat, a potym viartalisia ŭ siamji, — uzdychaje Lilija Stanisłavaŭna, svajačka pamierłaha Viktara Janceviča. — U Viktara Antonaviča była nievialikaja tempieratura, adčuvaŭ siabie dobra, a ŭ vyniku ŭsio tak skončyłasia… Lekary ž nie vinavatyja, jany robiać usio, što mohuć. U našaj miadzielskaj balnicy prosty renthien, jon nie pakazvaje ŭsiu karcinu. Ludziej adpraŭlajuć dadomu.
Na nastupny dzień u balnicy pamior 57-hadovy Piotr Vałyniec. Jon žyŭ u susiedniaj vioscy Kamarova. Jak raspaviadaje Alaksiej, syn pamierłaha, pakul paśviedčańnie ab śmierci baćki jon nie atrymaŭ, tamu nie viedaje, što napisana ŭ hrafie «pryčyna śmierci».
— U špitali jašče lažyć maja mama, taksama rabotnik internata, buchhałtar. Na dniach kazała mnie, što ŭ ich z tatam paćvierdzili COVID-19. Pieršym u balnicu trapiŭ baćka, heta było 3 maja, a mama — na nastupny dzień, — uspaminaje Alaksiej.
Pavodle jaho słoŭ, apošnija dni žyćcia Piotr Vałyniec byŭ padłučany da aparata ŠVŁ.
Siońniašniuju situacyju ŭ internacie adzin z vałancioraŭ ličyć «vielmi składanaj».
