Adna z «kandydataŭ pratestu» Vieranika Miščanka padčas pasiadžeńnia Centrvybarkama rezka aburyłasia dziejańniami kamisii.
«Ja vyjdu ŭ strym — i praź niekalki hadzin pad CVK budzie stajać 200 čałaviek», — papiaredziła jana členaŭ kamisii, jakija vyrašyli nie rehistravać jaje kandydatkaj.
Vieranika Miščanka. Skrynšot ź videa hramada.org
Paźniej kandydatka padzialiłasia ŭražańniami z «Našaj Nivaj».
«Paśla pasiadžeńnia ja im skazała, što jany pravilna robiać, što bajacca, bo rana ci pozna ŭsio zakančvajecca. Niachaj padumajuć, što ich čakaje napieradzie. Nu što jany mahli adkazać? Vočy apuścili, i ŭsio», — apisvaje toj dyjałoh kandydatka.
Žančyna dadaje, što źbirajecca abskardžvać pastanovu CVK.
«Učora ludziam telefanavali niejkija niezrazumiełyja dziaŭčaty, pytalisia: vy zapisvalisia ŭ inicyjatyŭnuju hrupu, a čamu, a navošta? Kali ich prasili pradstavicca, jany kidali słuchaŭku».
Pa słovach Vieraniki Miščanki, jana z paplečnikami ciapier farmiruje novuju inicyjatyŭnuju hrupu, dzie budzie tolki aktyŭ partyi — u ich jašče jość zapasnyja kandydaty. Usie zvanki z CVK buduć zapisvać i vykładać u internet.
«My, kaniečnie, možam sabrać ludziej, jak učora. Ale nam skazali, što prosta vykličuć AMAP i ludziam daduć sutki na padstavie niezakonnaj akcyi», — kamientuje žančyna.
