Siońnia žurnalistu-fryłansieru z Hłybokaha Źmitru Łupaču patelefanavali ź milicyi i skazali, kab jon siońnia ž javiŭsia ŭ pastarunak dla adbyćcia pakarańnia — 10 sutak administracyjnaha aryštu, pryznačanaha Hłybockim rajonnym sudom 11 maja, piša BAŽ.
Tady paśla sudovaha słuchańnia žurnalist adčuŭ siabie drenna, z budynku suda jaho zabrała chutkaja dapamoha, niekalki dzion jon pravioŭ u reanimacyi. Pavodle sudovaj pastanovy, jakuju Źmitru Łupaču ŭručyli 13 maja, sud zrabiŭ adterminoŭku adbyćcia pakarańnia, pryniaŭšy da ŭvahi paharšeńnie ŭ jaho stanu zdaroŭja.
Uśled za telefanavańniem da Źmitra Łupača pryjechaŭ staršy lejtenant milicyi Šarkaŭščynskaha RAUS Uładzimir Čapulonak i skłaŭ na jaho čarhovy pratakoł pavodle artykuła 22.9 KaAP. Hetym razam padstavaj staŭ siužet na telekanale «Biełsat» pra situacyju z karanavirusam u Šarkaŭščynie.
Milicyjant paviedamiŭ, što razhlad spravy pryznačany na 26 maja a 10.00 u Šarkaŭščynskim rajonnym sudzie.
«Napeŭna, vyrašyli «dabić», jak heta było z Kastusiom Žukoŭskim, Volhaj Čajčyc i Andrejem Koziełam, jakim pryjšłosia źjechać z krainy, — razvažaje Źmicier Łupač. — Ci ŭładam nie padabajecca, što ŭ nievialikim horadzie Hłybokaje, nasielnictva jakoha nie dasiahaje sta tysiač, pracuje karespandencki punkt «Biełsata».
A zranku 15 maja Źmicier Łupač nakiravaŭ u Viciebski abłasny sud kasacyjnuju skarhu na rašeńnie Hłybockaha rajonnaha suda.
Nahadajem, 11 maja sudździa Hłybockaha rajonnaha suda Dźmitryj Tarasievič pryznaŭ Źmitra Łupača vinavatym u parušeńni dvuch artykułaŭ Administracyjnaha kodeksa. Za supracu z telekanałam «Biełsat» sudździa vynies štraf u pamiery 45 bazavych vieličyń pavodle č. 2 art. 22.9 KaAP (niezakonny vyrab i raspaŭsiud pradukcyi ŚMI). A za sustreču z błohieram Siarhiejem Cichanoŭskim žurnalista abvinavacili va ŭdziele ŭ niesankcyjanavanym masavym mierapryjemstvie i pakarali aryštam na 10 sutak.
Paśla sudovaha pasiadžeńnia Źmitra Łupača z hipiertaničnym kryzam advieźli ŭ Hłybockuju rajonnuju balnicu. Tam jon pralažaŭ u reanimacyjnym adździaleńni da 13 maja. U toj dzień jaho vypisali z reanimacyi, prapanavali palažać u terapieŭtyčnym adździaleńni, ale Źmicier vyrašyŭ praciahnuć lačeńnie doma.
13 maja da jaho pryjechali hłybockija milicyjanty, uručyli jamu pastanovu suda, a taksama paprasili napisać raśpisku, što jon sam dobraachvotna źjavicca ŭ paniadziełak 18 maja dla adbyćcia pakarańnia.
