14 maja na kanale «Biełaruś-1» vyjšaŭ repartaž pra toje, jak biełaruskija prafsajuzy padtrymlivajuć miedykaŭ. Staršynia Minskaha abłasnoha abjadnańnia prafsajuzaŭ Viktar Malinoŭski sam pryvioz u Minskuju CRB srodki indyvidualnaj achovy — dezhieli, kala troch tysiač bachił, kambiniezony. Uvahu hledačoŭ pryciahnuli kadry, na jakich Malinoŭski raskazvaje pra dapamohu, a na zadnim płanie ciuki ź SIA… zahružajucca nazad u bahažnik aŭtamabila.
Naturalna, pad videa — dziasiatki niehatyŭnych kamientaroŭ. Što adbyvajecca? «Jeŭraradyjo» źviazałasia ź Viktaram Malinoŭskim, za čyjoj śpinaj ciuki zahružajuć u mašynu.
— Da mianie padyšoŭ doktar i skazaŭ: «Viktar Tadevušavič, adviazicie hetyja rečy na skład, kab ich nie nasili našy žančyny». Zahruzili, advieźli, ja ž nie moh skazać: «Ciahajcie», — kamientuje funkcyjanier. — U mianie słoŭ niama. Nie dumaŭ, što jość takoje staŭleńnie ŭ ludziej. Zdaryłasia niejkaje nieparazumieńnie, a ludzi ŭžo chutčej pa-svojmu traktavać. Adno tolki spadabałasia: 53 tysiačy pahladzieła. Dumaju, moža, nie va ŭsich niejak mazhi zaviornuty ŭ inšy bok.
Pa słovach Malinoŭskaha, z punktu hledžańnia televizijnaha majsterstva toje, što było pakazana, mahčyma i pamyłka. Ale nijakaja nie padstava. Prafsajuz sumlenna pryvioz u balnicu bachiły i kambiniezony.
— Prykra. Prosta nie dumaŭ, što ŭ nas jość takija ludzi, što dumajuć, što čynoŭniki ci hramadskija arhanizacyi zajmajucca niejkimi takimi spravami. Jak možna dobruju spravu ŭziać i aplavać? — dadaje jon.
