Viktar Babaryka, jaki zajaviŭ pra svoj namier udzielničać u prezidenckaj kampanii i padaŭ dakumienty dla rehistracyi ŭ CVK, pravioŭ žyvy efir z padpisčykami ŭ instahramie. Maksimalnaja kolkaść hledačoŭ efira pieravyšała 2300 čałaviek.
Babaryka patłumačyŭ, što nie maje prava raskazvać pra vybarčuju prahramu, kab heta nie paličyli ahitacyjaj. Tamu adkazvaŭ bolš na arhanizacyjnyja pytańni.
Pa słovach bankira, jaho kamanda ŭžo nabrała 53 kaardynatary, zakryŭšy imi ŭsie rajony abłasnych centraŭ, a taksama harady abłasnoha padparadkavańnia.
Podpisy dla ŭdziełu ŭ inicyjatyŭnaj hrupie praciahvajuć źbiracca da paniadziełka. Jaho kamanda źbirajecca abzvanić usich tych, chto paznačyŭ svaje źviestki, kab nie było pamyłak u dakumientach dla CVK.
Razvažajučy ab pracedury rehistracyi kandydataŭ, Babaryka tłumačyŭ, nakolki surjozna jaho kamanda spraŭdžvaje podpisy. Jon ličyć, što dziejańni Centrvybarkama pa praviercy dakumientaŭ — «heta nie farmalnyja prydzirki». Heta prahučała na nastupny dzień paśla taho, jak Lidzija Jarmošyna admoviłasia prymać dakumienty aryštavanaha błohiera Siarhieja Cichanoŭskaha praz adsutnaść jaho podpisu i vykinuła z vybaraŭ «kandydataŭ pratestu» Mikoły Statkieviča. «Ja absalutna ŭpeŭnieny ŭ kampietentnaści CVK i ŭ ich razumieńni taho, što kolkaść udzielnikaŭ lepšaja za jaje adsutnaść», — padsumavaŭ Babaryka.
Babaryka sumniajecca, ci varta ładzić vybarčyja sustrečy padčas pandemii. Schilajecca da varyjantu z anłajn-ahitacyjaj — budzie adkazvać anłajn na pytańni žycharoŭ taho ci inšaha rehijonu.
Na pytańnie pa-biełarusku adkazaŭ taksama pa-biełarusku, ale niaśmieła, padbirajučy słovy. Paabiacaŭ avałodać abiedźviuma dziaržaŭnymi movami.
