Urad Vialikabrytanii vydzieliŭ paŭmiljona funtaŭ sterlinhaŭ (heta prykładna 560 tysiač jeŭra) na prajekt, u miežach jakoha buduć daśledavać, ci zmohuć sabaki vyjaŭlać chvorych na karanavirus ludziej pa pachu.
Prajektam zajmajucca Łondanskaja škoła hihijeny i trapičnaj miedycyny, Daremski ŭniviersitet i dabračynnaja arhanizacyja Medical Detection Dogs, a taksama Nacyjanalnaja słužba achovy zdaroŭja Vialikabrytanii, paviedamlaje BBC.
Na pieršym etapie pracaŭniki Nacyjanalnaj słužby achovy zdaroŭja buduć adbirać uzory pachaŭ u pacyjentaŭ z karanavirusnaj chvarobaj (da prykładu, vykarystanyja maski). Paśla hetaha šaściarych sabak buduć treniravać dla vyznačeńnia virusa siarod uzoraŭ — na heta moža syści ad šaści da vaśmi tydniaŭ.
Na druhim etapie ŭrad pavinien vyrašyć, ci metazhodna vykarystoŭvać sabak dla vyjaŭleńnia COVID-19. Naprykład, ich možna było b raźmiaščać u aeraportach (dla chutkaj pravierki) abo centrach testavańnia, kab paskoryć praces vyjaŭleńnia karanavirusa.
Viadoma, što niekatoryja sabaki mohuć pa pachu vyjaŭlać zachvorvańni ŭ ludziej. Asobnyja ź ich mohuć «praanalizavać» da 250 čałaviek za hadzinu. Dabračynnaja arhanizacyja Medical Detection Dogs zajmajecca treniroŭkaj sabak u hetaj śfiery ŭžo 10 hadoŭ.
Letaś śpiecyjalisty Medical Detection Dogs i Daremskaha ŭniviersiteta navučyli sabak vyjaŭlać malaryju ŭ dziaciej z dakładnaściu 70%.
