19-hadovaha minčuka Andreja Michaleviča vyklikali ŭ milicyju za raźmiaščeńnie ŭ «UKantakcie» filma Nexta «Łukašenka. Kryminalnyja materyjały», jaki 21 listapada byŭ pryznany ekstremisckim materyjałam.
Niahledziačy na toje, što minčuk raźmiaściŭ rolik za miesiac da ŭniasieńnia jaho ŭ Respublikanski śpis ekstremisckich materyjałaŭ, na jaho ŭsio roŭna zaviali administracyjnuju spravu pa artykule 17.11 KaAP (Raspaŭsiud infarmacyjnaj pradukcyi, jakaja źmiaščaje zakliki da ekstremisckaj dziejnaści abo jakaja prapahanduje takuju dziejnaść), piša spring96.org.
Z Andrejem Michalevičam była praviedziena prafiłaktyčnaja hutarka ab niedapuščeńni raspaŭsiudžvańnia padobnaha rodu infarmacyi, a taksama rastłumačana adkaznaść za dadzienaje pravaparušeńnie. Pa č. 2 artykuła 17.11 KaAP praduhledžana nakładańnie štrafu da 50 bazavych vieličyniaŭ (540 rubloŭ) abo administracyjny aryšt.
Andrej Michalevič raźmiaściŭ videarolik 28 kastryčnika 2019 hoda. U toj čas jak rašeńnie suda Centralnaha rajona h. Minska ab pryznańni hetaha filma ekstremisckim ustupiła ŭ zakonnuju siłu 7 śniežnia 2019 hoda.
Minčuk raspaviadaje, što jon apublikavaŭ hety film u kastryčniku i zabyŭsia na jaho. Kali 15 maja supracoŭniki milicyi patelefanavali jamu, jon adrazu jaho vydaliŭ.
Spravu ab administracyjnym pravaparušeńni pa artykule 17.11 KaAP Andreja Michaleviča dniami pavinny pieradać u sud.
