Alaksandr Łukašenka padpisaŭ pryniaty parłamientam zakon «Ab amnistyi ŭ suviazi z 75-hodździem Pieramohi ŭ Vialikaj Ajčynnaj vajnie 1941-1945 hadoŭ», paviedamlaje BiełTA.
U zakonie vyznačany katehoryi hramadzian, jakija padlahajuć vyzvaleńniu ad pakarańnia: niepaŭnaletnija, ciažarnyja žančyny, žančyny i adzinokija mužčyny, majučyja dziaciej va ŭzroście da 18 hadoŭ, asoby piensijnaha ŭzrostu, invalidy I i II hrupy, vieterany bajavych dziejańniaŭ, asoby, jakija atrymali ranieńni ŭ pieryjad prachodžańnia słužby, jakija paciarpieli ad katastrofy na Čarnobylskaj AES, a taksama niekatoryja inšyja katehoryi asudžanych i abvinavačanych. Pavodle danych Ministerstva ŭnutranych spraŭ, kolkaść takich hramadzian składzie amal 5,4 tysiačy čałaviek.
Asobnym katehoryjam asudžanych, jakija nie padlahajuć poŭnamu vyzvaleńniu ad kryminalnaj adkaznaści, praduhledžvajecca skaračeńnie terminu pakarańnia ŭ vyhladzie pazbaŭleńnia abo abmiežavańnia voli na 1 hod. Ich kolkaść składzie amal 6,4 tys. čałaviek. U suviazi sa znakavaj histaryčnaj dataj i kirujučysia humannym padychodam, u adroźnieńnie ad papiaredniaj amnistyi 2019 hoda koła takich asob pašyrana za košt hramadzian, asudžanych za karupcyjnyja złačynstvy, a taksama za złačynstvy, źviazanyja ź niezakonnym abarotam narkatyčnych srodkaŭ i psichatropnych rečyvaŭ (za vyklučeńniem paŭnaletnich, asudžanych za narkazłačynstvy, što ŭčynieny ŭ składzie arhanizavanaj hrupy abo z vykarystańniem łabaratornaha abstalavańnia, a taksama pryviali da śmierci čałavieka).
Razam z tym amnistyja nie dapuskaje situacyju, kali mohuć być pastaŭleny pad pahrozu intaresy stabilnaha pravavoha paradku i hramadskaj biaśpieki. Tamu ŭ zakonie dakładna vyznačajecca pieralik katehoryj hramadzian, jakija ŭčynili złačynstvy, na jakich amnistyja nie raspaŭsiudžvajecca. U pryvatnaści razmova idzie ab asobach, jakija ŭčynili złačynstvy suprać dziaržavy, zabojstva, naniasieńnie ciažkich cialesnych paškodžańniaŭ, što pryviali da śmierci, złačynnyja dziejańni sieksualnaha charaktaru, inšyja złačynstvy, jakija charaktaryzujucca pavyšanaj hramadskaj niebiaśpiekaj (u tym liku parušeńnie pravił darožnaha ruchu ŭ stanie apjanieńnia, što pryviało da śmierci abo ciažkich cialesnych paškodžańniaŭ). Amnistyja taksama nie zakranie asob, jakija ŭčynili novyja naŭmysnyja złačynstvy paśla papiarednich aktaŭ amnistyi abo pamiłavańnia, nie kampiensavali naniesienuju škodu (uron), nie vypłacili atrymany złačynnym šlacham dachod, dapuścili asabliva niebiaśpiečny recydyŭ złačynstvaŭ, złosna parušajuć paradak adbyvańnia pakarańnia.
Amnistyja taksama nie raspaŭsiudžvajecca na asob, jakim pakarańnie ŭ vyhladzie śmiarotnaj kary ŭ paradku pamiłavańnia zamieniena pazbaŭleńniem voli abo pažyćciovym źniavoleńniem, abo na tych, jakim pakarańnie ŭ vyhladzie pažyćciovaha źniavoleńnia zamieniena pazbaŭleńniem voli, a taksama da asudžanych da pažyćciovaha źniavoleńnia.
