Unikalnaje hniezdavańnie kałonii uniesienaj u Čyrvonuju knihu šyzaj čajki vyjaŭlena ŭ Breście, paviedamiŭ BiełTA namieśnik dyrektara pa navukovaj pracy Paleskaha ahrarna-ekałahičnaha instytuta NAN Biełarusi Viktar Dziamiančyk.
«Kałonija z troch par šyzych čajek hniaździłasia ŭ hrakoŭniku. Takoha da hetaha času ŭ litaratury nie sustrakałasia. Druhoje: ptuška raźmiaściłasia na vielmi vialikaj vyšyni (22 m) u žyvych drevach. Jany, jak areli, razhojdvajucca da 2 m, ale heta nie pieraškadžaje ptuškam vysiedžvać jajki. I samaje cikavaje, što heta skvier zavadskoj terytoryi», — raspavioŭ navukoviec.
Šyzaja čajka ličycca paŭnočnaj ptuškaj. Areał jaje pražyvańnia całkam achoplivaje paŭnočnuju prypalarnuju zonu. U Biełarusi vid u asnoŭnym pradstaŭleny ŭ Viciebskim Paazierji, dzie hniaździcca na vierchavych bałotach i karjerach vypracavanych torfaraspracovak. Tym nie mienš šyzaja čajka pastupova raśsialajecca na poŭdzień i dasiahnuła šyrot Bresta, dzie da hetaha času była viadomaja i šyroka pradstaŭlenaja aziornaja čajka.
«Cikava, što hrupoŭka šyzych čajek źjaviłasia ŭ nas u kancy zimy i zdoleła razahnać kałoniju hraka. Choć u normie zvyčajna naadvarot: ptuški rodu krumkačoŭ ličacca drapiežnikami ŭ kałonijach čajek. Hniozdy hrakoŭ mocnyja, tamu čajki asabliva siabie nie turbavali. Choć jany taksama ŭmiejuć budavać hniozdy, ale ŭ hetym vypadku kvaternaje pytańnie ŭ ich było vyrašana prosta», — adznačyŭ Viktar Dziamiančyk.
«Pad prykryćciom šyzych čajek źjaviłasia kałonija drazda-rabińnika, jaki taksama zaŭsiody pakutuje ad krumkačovych, zasialilisia i ŭžo paśpiachova vyvieli pieršych svaich ptušaniat hałuby-viachiry, inšyja drabniejšyja ptuški. Heta značyć, u zavodskim skviery stvaryłasia cełaja supolnaść. Pryčym hetyja ptuški całkam karysnyja, jany nie stvarajuć ludziam nijakich prablem», — dapoŭniŭ Viktar Dziamiančyk.
