Premjer-ministr Estonii Jury Ratas raspavioŭ, što padčas nadzvyčajnaha stanovišča vymušany byŭ žyć asobna ad svajoj siamji, piša Delfi sa spasyłkaj na Eesti Ekspress.
Jury Ratas, fota Priit Simson, Eesti Express
«Sam ja karanavirusa nie bajaŭsia, ale ŭ metach abarony siamji vyrašyŭ prykładna na čatyry tydni źjechać z doma. Maja mama časova pierajechała da nas, a ja — u baćkoŭski dom u Nymie [rajon na poŭdni Talina — NN]. Troje maich starejšych dziaciej naviedvajuć škołu. Dystancyjnaje navučańnie i ŭsie chatnija spravy — heta toje, u čym maja mama moža dapamahčy bolš, čym ja, pracujučy z samaj ranicy da poźniaha viečara. Było jasna, što patencyjna ja mahu zarazicca virusam, pakolki ja niepaźbiežna kantaktuju z mnostvam ludziej. Što da majoj mamy, to jana adnosicca da hrupy ryzyki, i heta było pravilnym rašeńniem», — raspaviadaje 41-hadovy premjer.
Jon adznačaje, u Domie Stenboka [rezidencyja ŭrada] jon ni razu ŭ pramym sensie nie načavaŭ, ale byvała, što pamiž sychodam i viartańniem prachodziła ŭsiaho niekalki hadzin. «Ja nie skardžusia, prosta heta byŭ realny temp pracy. Nasamreč heta było składana. Ale my spravilisia».
«Try razy na tydzień ja prynosiŭ im dadomu pradukty, pakidaŭ sumku za dźviaryma. My nie kantaktavali. Ja hladzieŭ na dziaciej [ich u Ratasa čaćviora], žonku i mamu praz akno.
Heta było vydatna! Samamu małodšamu majmu dziciaci hod i vosiem miesiacaŭ, i ŭ niejki momant jon staŭ adychodzić, nie razumiejučy, čamu tata za aknom, a nie ź imi. My machali adzin adnamu. Kantakty z Karyn [žonkaj] i dziećmi adbyvałasia z dapamohaj videasuviazi. Testu na karanavirus mnie rabić nie pryjšłosia. Ja ŭžyvaŭ šmat vitaminu S i D, uzmocniena nalahaŭ na imbir i časnyk», - praciahvaje kiraŭnik urada.
«Kali kazać pra baćku, to apošnija dva miesiacy ŭ domie pa dohladzie dla jaho byli vielmi składanymi. Jaho situacyja źviazanaja nie z COVID-19, a ź inšymi spadarožnymi zachvorvańniami. Adnojčy pozna ŭviečary mnie patelefanavali z balnicy i prapanavali pryjechać naviedać baćku, pakolki jaho stan rezka pahoršyŭsia. Ale ja byŭ daloka i nie zmoh pajechać. Na ščaście, da ranicy jamu stała lepš. Ciapier samyja ŭraźlivyja miescy ŭ Estonii — heta mienavita damy pa dohladzie starych. Kali karanavirus prabiarecca tudy, dla mnohich heta moža aznačać śmierć».
Premjer-ministr pryznaje, što nie ŭsie pryniatyja ŭradam rašeńni byli viernymi: «Naprykład, toje, što my dali pryvatnamu siektaru jašče niekalki dzion na zakryćcio biźniesu. Heta było niapravilna, tamu što jany vykarystoŭvali hetuju mahčymaść, kab zładzić rasprodažy. Toje ž samaje z masavymi mierapryjemstvami, jakim nam varta było b skazać kateharyčnaje «nie». Tak, mierapryjemstvaŭ na vostravie Saaremaa [tam adbyłasia mocnaja ŭspyška] mahło b nie być. Jasna i toje, što srodkaŭ indyvidualnaj abarony ŭ nas pavinna być bolš. My vielmi ŭdziačnyja estonskim pradpryjemstvam, jakija adkarektavali svaje vytvorčyja cykły i pryjšli na dapamohu».
«Ciapier ja pierajechaŭ nazad dadomu, ale mama zastaniecca ŭ nas da zakančeńnia navučalnaha hoda. Apošnija tydni ja dabiraŭsia da pracy albo bieham, albo na rovary.
Dziakuj bohu, usio horšaje na hety raz zzadu. Dziakujučy toj pracy, što vykonvałasia na pieradavoj: miedycynie, sacyjalnaj śfiery, departamientu palicyi i pamiežnaj achovie, vyratavalnym departamientam, siłach abarony, samaabarony, miascovaha samakiravańnia, škołam, redakcyjam ŚMI, — harantavalisia naša biaśpieka i padtrymlivałasia nadzieja. Tak, hramadstva ŭziało siabie ŭ ruki, i ad uśviedamleńnia hetaha — muraški pa skury. Surjozna!»
***
Estonija adnoj ź pieršych krain u Jeŭropie ŭviali strohija miery: zakryła miažu z Łatvijaj i Rasijaj, paromnaje złučeńnie ź Finlandyjaj, zakryła avijaprastoru, zakryła škoły. U krainie padrabiazna paviedamlałasia statystyka pa chvorych, a ministr sacyjalnych spraŭ Taniel Kijk ledź nie kožny dzień ładziŭ pres-kanfierencyi.
Na minułym tydni Estonija zajaviła, što vychodzić z karanavirusa, adkryvaje miažu z Łatvijaj i viartaje avijarejsy. 19 maja tam startavaŭ futbolny čempijanat.
Za ŭvieś tam zachvareŭ 1791 čałaviek, z 1 maja kožny dzień kolkaść novych vypadkaŭ mienš za 10. Za ŭvieś čas pamierli 64 čałavieki.
