Kiraŭnik Libieralna-demakratyčnaj partyi Aleh Hajdukievič 26 maja abviaściŭ, što zdymajecca z vybaraŭ i budzie hałasavać za Łukašenku. «NN» pahavaryła z Hajdukievičam pra inšych kandydataŭ, a taksama jahonyja ambicyi ŭ budučyni.

«NN»: Vy padtrymali Łukašenku. Ale ž jość šmat inšych kandydataŭ. Naprykład, Cichanoŭski.

Aleh Hajdukievič: Ja zaŭždy suprać balšavikoŭ. Suprać «šarykavych». Zabrać i padzialić. Jon jeździć pa haradach i vioskach, kaža, što treba vychodzić na Płošču, što ŭsio treba vyrašać z dapamohaj pałak. Heta Šarykaŭ tak biehaŭ i kazaŭ: «Zabrać i padzialić». Heta prahrama Šarykava.

Z druhoha boku, miascovyja ŭłady pavinny raźbiracca pa tych prablemnych momantach, jakija Cichanoŭski padymaje ŭ svaich videa. Kahości z čynoŭnikaŭ treba źniać i pasadzić, pry hetym prypyniajučy lubyja sproby Płoščaŭ. Ja hetaha nikoli nie padtrymaju, kateharyčna kažu. Padabajecca heta kamuści ci nie, ale ŭsie papiarednija vybary vyjhravaŭ Łukašenka.

«NN»: Capkała?

AH: Ja vielmi skieptyčna staŭlusia da čynoŭnikaŭ. Ja siońnia ŭžo kazaŭ na pres-kanfierencyi, što ŭ budučyni nielha abapiracca na čynoŭnikaŭ. Treba pravodzić reformu, kab u nas u krainie byli mocnyja partyi, palityki. Čynoŭniki jany takija — siońnia pracujuć i ŭsim zadavolenyja, a jak tolki zvalniajuć…

Byŭ taki Kazulin, rektar BDU, usio jamu dobra było. Jak tolki źniali, to, pa jahonych słovach, kraina ŭ dupie, treba pačynać revalucyju. Rektar BDU — heta ahramadnaja adkaznaść! I toje samaje Capkała. Dvaccać hadoŭ pracavaŭ čałaviek, usio zadavalniaje, tut jaho zvalniajuć, try hady siadzić, novaj pasady nie dajuć. Jak ža tak, mianie, takoha vialikaha śpiecyjalista, nikudy nie pryznačajuć, idu ŭ prezidenty!

Mnie heta nie padabajecca. U nas kali ŭłada pamianiajecca, to mnohija čynoŭniki pračnucca, šapku pamianiajuć i skažuć, što zaŭsiody byŭ «za». Heta samyja strašnyja ludzi bieź ideałohii i pierakanańniaŭ, u ich ni sumleńnia, ni pryncypaŭ. Ja nie chaču pakryŭdzić Capkału — heta majo mierkavańnie. Pra takich čynoŭnikaŭ, jakija praz 20 hadoŭ stanoviacca supierapazicyjanierami. I pačynajuć usim hrošy razdavać, va Ukrainie ŭžo razdali.

«NN»: Babaryka?

AH: Heta čałaviek z ahramadnym finansavymi resursami. Ja ŭvohule liču, što ŭ budučyni ŭ nas pavinna być takaja palityčnaja sistema, jakaja b abaraniała nas ad ludziej z hrašyma, što mohuć pryjści ŭ palityku i ŭsio tam skuplać.

Čamu? Siońnia šmat havorać pra vybarnaść meraŭ. Ujavim, što ŭ nas samyja volnyja ŭ śviecie vybary, i chto tady pieramoža? Ja vam harantuju, što toj, u kaho najbolš hrošaj, pahladzicie na Ukrainu. Što treba rabić? Partyjnyja śpisy, vybary ŭ abłasny saviet, tudy prachodzić čatyry partyi i jany majuć prava vyłučać kandydata ŭ mery. Ja liču, što na vybary pavinny iści ludzi sa zrazumiełaj ideałohijaj i pohladami, a nie terminova źbirać vakoł siabie ŭsio, što možna. Mianie možna nie lubić, ale pohlady mianie i majoj partyi zrazumiełyja. A tut niejki sucelny papulizm. Mnie nie padabajecca chto akružaje Babaryku. Pavyłazili levyja, zialonyja, krajnija, usie. A astatnija — heta pa 0,5%.

«NN»: Čamu na vybarach niama apazicyi?

AH: Apazicyja pamierła jašče ŭ 2015 hodzie. Tady nie było pandemii, ale nichto sa staroj apazicyi nie zmoh sabrać podpisy. Ni Kalakin, ni AHP — nichto. Sioleta nastupiła kančatkovaja śmierć.

Majo rašeńnie pravilnaje — ja ŭ palityku pryjšoŭ nie na adzin dzień, i heta rašeńnie ź pierśpiektyvaj. Ja zastajusia deputatam, u mianie nie budzie projhryšu na vybarach. Adrazu paśla prezidenckich vybaraŭ treba pačynać reformy: ekanamičnyja, palityčnyja. Bo kali ich nie pačać, to jašče praz 5 hadoŭ buduć takija vykliki, ź jakimi my nie spravimsia. My pavinny raścić partyi, kab u nas nie vyskokvali z-za vuhła Capkała, Babaryka. Chaj vyskokvajuć, ale iduć u KPB, u BNF, rastuć tam, dakazvajuć. U nas pavinna być sistemnaja palityka.

«NN»: Vaš baćka zdymaŭsia z vybaraŭ u 2010 hodzie — heta adnolkavyja situacyi?

AH: Heta ŭvohule nie 2010 hod, tady ŁDPB źniałasia i skazała, što heta cyrk. Ciapier zusim inšaja pazicyja. Ja źniaŭsia, ale kažu, što treba iści na vybary i hałasavać za Łukašenku, bo heta adziny čałaviek, jaki moža zabiaśpiečyć suvierenitet krainy. Nam nie mieniedžar patrebny, a lidar nacyi. U Małdovie kolki ŭžo ŭradaŭ mieniedžaraŭ było? Va Ukrainie Zialenski choć adno pytańnie rašyŭ? A dla mianie niezaležnaść važniejšaja za lubyja asabistyja ambicyi, jakich u mianie niamała.

«NN»: Siońnia skazali, što vy nie «prastytutka». Što heta značyć?

AH: Dakalabalisia da słova «prastytutka». Dla mianie prastytutka — toj, chto niezrazumieła za što vystupaje. Ja ž abaznačyŭ, za što ja.

«NN»: Pa apytańniach u internecie Łukašenka słaby jak nikoli. Mo varta było ŭsio ž brać uładu ŭ svaje ruki?

AH: Heta iluzija, što Łukašenka słaby. Mnohija našyja palityki žyvuć u fejsbuku. A ŭ fejsbuku revalucyja ŭžo adbyłasia! Biełaruś — heta nie fejsbuk, heta vioski, harady, ludzi, jakija nie siadziać u sacsietkach. Treba čaściej u ludzi vychodzić. Udzielničać u vybarach treba, kab pieramahać. Ja prama kažu, što hetyja vybary ja nie vyjhraju.

A prosta krasavacca nie chaču, ja i tak dastatkova viadomy čałaviek. Mianie i tak viedajuć. «Naša Niva» pisała, što Hajdukievič nakručvaje hałasy. A vy vierycie, što astatnija nie nakručvajuć? Ja nie duža vieru.

«NN»: Z Administracyi prezidenta siońnia nie zvanili? Pasadu nie prapanoŭvali?

AH: Takoha nie byvaje. Ja ž nie z vulicy pryjšoŭ, ja deputat, mnie chapaje pracy. Ja hatovy supracoŭničać sa štabam Łukašenki, ale heta budzie rašać sam prezident.

Čytajcie. U apytancy «NN» niechta sprabavaŭ nakrucić hałasy za Hajdukieviča LIČBY

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?