Mahiloŭski adździeł Śledčaha kamiteta rasśleduje kryminalnuju spravu ŭ dačynieńni da 41-hadovaj žycharki Mahilova, padazravanaj u kradziažy hrošaj šlacham złoŭžyvańnia słužbovymi paŭnamoctvami, paviedamlaje sk.gov.by.
Pavodle śledstva, padazravanaja, pracujučy načalnicaj adnaho z paštovych adździaleńniaŭ, nie mienš za try hady vykradała hrašovyja pieravody. Ad dziejańniaŭ žančyny paciarpieli indyvidualnyja pradprymalniki, jakija realizoŭvali svoj tavar praź internet i dasyłali jaho z nakładzienym płaciažom pakupniku. Pry atrymańni pasyłki ŭ inšym paštovym adździaleńni adrasat apłačvaŭ sumu nakładzienaha płaciažu, jakaja zatym pieraličvałasia na adras adpraŭnika hrašovym pieravodam. Pradprymalniki naležnym čynam nie viali ŭlik atrymanaj apłaty, čym i skarystałasia padazravanaja, prysvojvajučy častku hrašovych pieravodaŭ.
Hety sposab byŭ nie adzinym. Kali ludzi vypisvali haziety i časopisy na chatni adras, padazravanaja ŭnosiła łžyvyja źviestki ŭ bazu danych, pakazvajučy padpisku da zapatrabavańnia, jakaja tańniej. Roźnicu prysvojvała.
Taksama vyśvietlena, što padazravanaja, dakładna viedajučy ab śmierci piensijanierki, prysvojvała hrašovyja srodki, jakija pradpryjemstva pieraličvała joj dva razy na hod u jakaści ŭznaharodžańnia jak byłomu rabotniku.
Sioleta adzin z paciarpiełych pradprymalnikaŭ źviarnuŭ uvahu na niedastatkovuju kolkaść atrymanych pieravodaŭ i źviarnuŭsia ŭ milicyju.
Papiarednie ŭron ad dziejańniaŭ padazravanaj składaje bolš za siem tysiač rubloŭ. Śledstva praciahvajecca.
