Lidar KCHP-BNF Zianon Paźniak apublikavaŭ u fejsbuku svajo bačańnie vybaraŭ-2020. Dastałasia ŭsim udzielnikam pracesu.
Zianon Paźniak, fota «Radyjo Svaboda»
Paźniak miarkuje, što va ŭdziele Viktara Babaryki i Valeryja Capkały zacikaŭleny jak režym Alaksandra Łukašenki, tak i Maskva.
«Dalokasiažnaja rola dla Maskvy — heta stvareńnie važkich palityčnych fihur nibyta alternatyŭnych Łukašenku, jakija buduć pryznanyja i kantralavanyja Maskvoj, Eŭraźviazam i ZŠA (vakansija «Milinkieviča», jaki vykonvaŭ hetuju rolu, ciapier jakraz pustuje). Maskva rychtuje na budučyniu novuju, užo namenklaturnuju, zrusifikavanuju (biez nacyjanalnych biełaruskich «zamaročak») kirujemuju alternatyvu režymu, jakaja pry patrebie budzie skarystanaja dla zamieny Łukašenki», — pierakanany jon.
Palityk dadaje, što pavyšanaja ŭvaha da Babaryki i Capkały z boku ŚMI dapamahaje pieraklučyć hramadstva z temy karanavirusa i dziejańniaŭ Łukašenki, jaki, maŭlaŭ, vykarystoŭvaje pandemiju dla źniščeńnia biełarusaŭ.
Pra Babaryku
«Spadara Babaryku pačali rychtavać da hetaj roli jašče try hady tamu. Jakraz tady jon pačaŭ vystupać publična (naprykład, u biznes-kłubie «Imahuru» na Fabrycyusa) z apaviadańniami pra svaje paniaćci, pra acenki ekanomiki, finansaŭ i t. p. na tym ža ŭzroŭni, što i ciapier z pseŭdakrytykaj sistemy. I nichto jaho, čynoŭnika režymu, nia rušyŭ».
Pra Capkału
«Što datyčyć «dypłamata» sp. Capkały, to jon jak kadravy funkcyjanier «vsiehda hotov», svajoj roli ŭ vybarčaj kampanii i svaich «ruskamirskich paniaćciaŭ» navat nie chavaje».
Pra Cichanoŭskaha
«Spadar Cichanoŭski kamunikujecca nie ŭ FB. Jon u kantorskaj «VKontaktie». Na pytańnie pra 1991 hod — nacyjanalnuju revalucyju i Niezaležnaść Biełarusi, replika (— a eto kohda Sovietskij Sojuz raspałsia). Pra Pahoniu i Biełaruski ściah (— kak narod riešit) i h. d. Jak kažuć, ad siabie nie ŭciačeš.
Tut typovaja pazycyja čałavieka, jaki znachodzicca pad upłyvam maskoŭskaj idealohii hibrydnaj vajny. Takich ludziej časam nazyvajuć «ahientami ŭpłyvu», prytym jany navat samy pra toje nie zdahadvajucca, ale dziejničajuć u rečyščy čužoj palityki.
Takoje zdarajecca ź ludźmi, u jakich nie pastaŭleny i nie sfarmavaŭsia narmalny nacyjanalny chrybiet, nacyjanalnaja hodnaść, honar za movu, historyju i svoj narod, jaki pieražyvie vyprabavańnie. Ciapier u režymnaj Biełarusi, dzie łukašyzm niščyć usio biełaruskaje, nacyjanalnaja niedafarmavanaść asoby stała ŭžo sacyjalnaj asablivaściu ŭ hramadztvie.
Zrešty, u takich ludziej (kali jany nie zavierbavanaja ahientura, viadoma) jašče jość perspektyva asabistaha nacyjanalna-kulturnaha raźvićcia ŭ intaresach Biełarusi. Ale pakul što vidovišča nie najlepšaje…
Zrazumieła, što lalkavody na Cichanoŭskaha šmat nia staviać, u jaho inšyja funkcyi (pryciahnuć ludziej na vybary), ź jakimi jon spraŭlajecca».
Pra Statkieviča
«Pobač ź Cichanoŭskim fihuruje (taksama ŭžo havoryć pa-rusku) niaźmienny «pratestant» Statkievič, viadomy pravakatar paboišča 2010 hoda. Stanovišča pakul dvuznačnaje. Pratest pavinien pašyracca. Abjektyŭna Cichanoŭski raschistvaje režymny sacyjalny marazm, ludzi adhukajucca, padtrymlivajuć. Biada tolki ŭ tym, što tam, dzie Statkievič i kantora, sprava zaŭsiody zakančvajecca drenna».
