Daśledčyki ź Vialikabrytanii i ZŠA vyvučyli suviaź pamiž «hienam demiencyi», vysokaj ryzykaj zaražeńnia karanavirusnaj infiekcyjaj i ciažkaj formaj COVID-19. Svaje vyniki jany apublikavali ŭ časopisie Journal of Gerontology, karotkija vysnovy jość na TheScientist, pieradaje TUT.BY.
Hien APOE ε4, jaki pavyšaje ryzyku raźvićcia chvaroby Alchiejmiera ŭ ludziej, akazaŭsia taksama źviazany z COVID-19. Pavodle niadaŭniaha daśledavańnia, palimorfny alel APOE4 u dva razy pavyšaje vierahodnaść raźvićcia ciažkaj formy zachvorvańnia, vyklikanaha karanavirusam SARS-CoV-2.
Daśledčyki z Eksieterskaha ŭniviersiteta vykarystoŭvali hienietyčnyja danyja i danyja pra zdaroŭje dobraachvotnikaŭ z brytanskaha bijabanka. Z pryblizna 383 tysiač čałaviek jeŭrapiejskaha pachodžańnia, uklučanych u daśledavańnie, bolš za dzieviać tysiač byli nośbitami dźviuch kopij ε4 zhadanaha vyšej hiena ApoE.
Zatym navukoŭcy supastavili hety śpis ź ludźmi, u kaho byŭ stanoŭčy vynik na COVID-19 u pieryjad z 16 sakavika pa 26 krasavika, — miarkujecca, što bolšaść hetych vypadkaŭ byli ciažkimi, pakolki testavańnie ŭ toj čas rabili tolki ŭ surjoznych vypadkach.
Analiz pakazaŭ, što homazihotny hienatyp APOE4 ε4 byŭ źviazany z padvojenaj ryzykaj raźvićcia ciažkaha chodu karanavirusnaj infiekcyi ŭ paraŭnańni ź ludźmi, u jakich była raznavidnaść hiena pad nazvaj ε3.
Adnak vyniki možna traktavać pa-roznamu. Z adnaho boku, toje, što ŭ ludziej z demiencyjaj čaściej raźvivajecca ciažki COVID-19, sapraŭdy moža tłumačycca asablivaściami ich hienaŭ. Ale ź inšaha — pakul nielha skidać z rachunkaŭ i ŭmovy ŭ damach sastarełych. Ci ž, jak ličyć Devid Kiercis, hanarovy prafiesar Instytuta hienietyki ŭniviersiteckaha kaledža Łondana, demiencyja sama pa sabie hraje rolu. Kab vyklučyć hety faktar, treba pravieści daśledavańnie siarod bolš maładych ludziej.
Kali APOE4 upłyvaje na chadu SARS-CoV-2 infiekcyi, jon nie budzie pieršym hienam, jaki źjaŭlajecca važnym faktaram. Varyjanty ŭ hienie ACE2, jaki kadziruje białok SARS-CoV-2, taksama byli źviazany z usprymalnaściu abo surjoznaściu praciakańnia COVID-19 u papiarednich daśledavańniach.
