Były kiraŭnik Parka vysokich technałohij Valeryj Capkała, jaki ŭdzielničaje ŭ prezidenckaj kampanii, usio jašče šmat dla kaho zastajecca zahadkaj. U apošniuju viasnovuju piatnicu pretendent vyrašyŭ sustrecca z vybarcami Kamiennaj Horki, samaha šmatludnaha rajona Minska. Miescam dla sustrečy stała placoŭka la handlovaha centra Green City.

Amal adrazu na vychadzie z padziemnaha pierachodu raźmiaścilisia dva punkty pa zbory podpisaŭ: za Capkału i za Babaryku. Takich natoŭpaŭ, jakija nazirajucca va ŭsich haradach za Cichanoŭskaha, tam nie było. Tym nie mienš, za Babaryku padpisvajucca kudy bolš achvotna, čym za Capkału. Dy i pikiet prychilnikaŭ bankira vyhladaje bolš prezientabielna.

Capkałaŭcy źbirajuć podpisy na stolikach z brendavańniem «Rečyckaje piva». Stend nienadziejny, adzin raz jaho litaralna zdźmuła vietram, daviałosia łavić, kab nie źlacieła kudy dalej. Podpisy źbiraje biełaruskamoŭnaja žančyna. «Jaki vaš rajon?» — pytajecca jana ŭ kožnaha, chto padychodzić da jaje. Potym šukaje adpaviednyja błanki. Padychodziać padpisvacca ludzi, u jakich na pašpartach vokładki z Pahoniaj.

Sam Valeryj Capkała spaźniajecca až na 20 chvilin. Ludziej čakaje niamnoha. Na mabilnik tranślacyju viadzie Juryj Radźkoŭ, toj samy «Car-Miod», jaki kaliści chacieŭ pajści ŭ prezidenty, a ciapier ładzić viečary, dzie čytaje vieršy Stalina. Prychilnikaŭ Babaryki jon pierakonvaje, što nasić maski — heta duraść. Zdajecca, jaho nie słuchaje nichto.

Kandydat prychodzić u viatroŭcy Paul & Shark Royal Yacht Club i čyrvonaj biejsbołcy Polo. Pobač ź im žonka Vieranika. Adrazu ahučvaje ličby, što za jaho ŭžo paśpieła padpisacca amal 30 tysiač čałaviek. Zaklikaje raśpisvacca za ŭsich. «Ciapier nie čas vyznačacca», — kaža jon.

«U nas jość tradycyjny pratestny elektarat. I tak akazałasia, što Cichanoŭski adziny, jaki na pratestnym fłanzie. Ja nie vialiki prychilnik Sałžanicyna, ale jon u svajoj pracy «Čyrvonaje koła» skazaŭ, što najbolš ciažka nakreślić siaredniuju liniju hramadskaha raźvićcia», — skazaŭ Capkała pra papularnaść Cichanoŭskaha. Viadoma, jon ličyć, što mienavita jaho kamanda sprabuje kreślić siaredniuju liniju.

«Naša prahrama nie niehatyvisckaja, a pra Biełaruś budučyni». Capkała pryznaŭsia, što choča prybrać «Tabakierki», kab rabilisia dobryja darohi i jakasnyja budynki dla žylla. «Pahladzicie, u kramach polskija jabłyki, bulba, redźka. My nie možam navat vyraścić toje, što ŭ Biełarusi raście».

Ahułam pasłuchać pretendenta sabralisia niekalki dziasiatkaŭ čałaviek. Dziaŭčyna zapytałasia, ci ŭ jahonaj Biełarusi budučyni milicyjaniery buduć atrymlivać bolš za nastaŭnikaŭ i miedykaŭ. Capkała syšoŭ ad pramoha adkazu. Jon skazaŭ, što za toje, kab milicyjaniery, jakija zajmajucca papiarovaj pracaj nie sychodzili rana na piensiju. A voś ludzi, jakija sapraŭdy pracujuć u poli, łoviać złačyncaŭ, majuć prava na takuju pieravahu. A voś adukacyju jon nazvaŭ samaj važnaj śfieraj žyćcia ŭ našaj krainie.

«Adukavany čałaviek stvaraje takija kampanii, jak Apple, Google, EPAM, Wargaming, a dziaržava ŭkładaje 200 miljonaŭ dalaraŭ u Škłoŭskuju papiarovuju fabryku, a hazietnaja papiera ŭžo nikomu nie patrebna. Lepš hetyja hrošy addać na adukacyju i achovu zdaroŭja».

U toj samy dzień Alaksandr Łukašenka namiaknuŭ, što maje kampramat na Capkału. Jon paprasiŭ, kab žurnalisty pacikavilisia, za što ž jaho zvolnili z PVT. Zroblena. «Dziesiać hadoŭ — heta dastatkovy čas, stvaryŭ niešta, papracavaŭ. Dobra ty spraviŭsia, kiepska, chaj pra heta spračajucca historyki».

Siarod tych, chto pryjšoŭ da Capkały byŭ mužčyna, jakoha žychary Kamiennaj Horki dobra vizualna viedajuć. Jon vielmi časta siadzić u padziemnych pierachodach razam sa svaim sabakam. Dyk voś hety mužčynka spačatku sabraŭ apładysmienty, spytaŭšy, ci płanuje Capkała začynić ŁTP. Pretendent skazaŭ, kali suśvietnaja praktyka takaja, to začynim.

Potym hety ž mužčyna prynios kandydatu kavu z «Burhier-Kinha». «Dy chto ja taki ŭ paraŭnańni z Łukašenkam?» — rospačna kazaŭ jon.

«Łukašenka nie car i nie boh. Jon taki samy čałaviek, jak i vy», — adkazaŭ Capkała. Potym jany navat abnialisia. Abdymaŭsia Capkała i z pjanym ci to tokaram, ci to naładčykam MTZ, jaki aburaŭsia, što da vizitu Łukašenki na zavodzie zrabili pakazuchu. «Biessensoŭna prezidentu jeździć na zavody», — skazaŭ pretendent.

«Dzie vaša sapiornaja rydloŭka?» — spytaŭ čałaviek, jaki namiakaŭ na toje, što iści z pustymi rukami na prezidentcva nierazumna. «Ja słužyŭ u rakietnych vojskach», — adžartavaŭsia Capkała. Nie adkazaŭ i pra toje, jak jon źbirajecca adstojvać pieramohu. «Pavinna być intryha, pakiniem heta na nastupny etap».

Capkała suprać lehalizacyi narkotykaŭ, ale za źmiakčeńnie zakanadaŭstva. Kaža, što pry pieršym zatrymańni moža być i administracyjnaje pakarańnie, kali heta nie raspaŭsiud.

Vykazaŭsia jon rašuča suprać «dekreta ab darmajedach». «Va ŭsim śviecie takim ludziam dapamahajuć, a nie karajuć», — skazaŭ jon.

«Ja chaču, kab usie biełarusy mahli zarablać stolki ž, jak prahramisty», — na raźvitańnie skazaŭ Capkała. A łahičny kaniec sustrečy nadyšoŭ, kali toj samy spadar z sabačkami prynios Vieranicy Capkała bukiet łandyšaŭ. Abdymalisia ŭžo ŭsie troje.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?