Pravaabaroncy-viasnoŭcy paviedamlajuć pra zatrymańni aktyvistaŭ pa usioj Biełarusi.
Ranicaj 31 maja zatrymanyja troje siabraŭ inicyjatyŭnaj hrupy Śviatłany Cichanoŭskaj — Uładzimir Maroz z Kobryna, Valeryj Ramanovič ź Pinska, Alaksandr Miluk z Mastoŭ. Pieršaha dastavili ŭ miascovy RAUS. Miluku ŭručyli pazoŭ i advieźli ŭ Śledčy kamitet u Hrodnie, kab dapytać jak śviedku pa kryminalnaj spravie, uzbudžanaj paśla incydentu ŭ Hrodnie 29 maja. Dniom Miluka vyzvalili, jon pryjechaŭ na Savieckuju płošču ŭ Hrodnie, dzie idzie zbor podpisaŭ. Valeryja Ramanoviča taksama adpuścili.
Taksama «Viaśnie» paviedamili, što ŭ Minsku zatrymany aktyvist «Narodnaj Hramady» Valancin Trocki. Kala 14.00 stała viadoma, što aktyvistu stała drenna, u jaho hipiertaničny kryz. Jaho viazuć u balnicu chutkaj miedycynskaj dapamohi.
Mikałaja Statkieviča kala 12:30 zatrymali ludzi ŭ cyvilnym pa darozie na pikiet na Kamaroŭcy. Jaho pavieźli ŭ RUUS Leninskaha rajona Minska.
Volha Nikałajčyk paviedamiła, što taksama zatrymanaja aktyvistka «Narodnaj Hramady» Vieranika Miščanka i jašče niekalki čałaviek, u jakich była aparatura dla minskaha pikieta.
Pravaabaroncam paviedamili, što ŭ Hrodnie taksama zatrymany Valeryj Jepifanaŭ. Pad domam adnoj z kaardynatarak inicyjatyŭnaj hrupy ŭ Ščučynie Hanny Ramancevič taksama dziažuryć milicejskaja mašyna. Takaja ž situacyja skłałasia ŭ kaardynatara IH Cichanoŭskaj pa Homieli i Homielskaj vobłaści.
Ranicaj 31 maja na vyjeździe z Baranavičaŭ zatrymali aktyvistku Tamaru Patockuju. Pryčyna - «nie projdzieny techahlad». Jaje pavieźli ŭ RUUS u supravadžeńni piaci milicejskich mašyn ź mihałkami.
Paviedamlajecca, što ŭ Vilejskim RAUS z ranicy znachodziŭsia zatrymany na try hadziny aktyvist Alaksiej Siudak. Stała viadoma, što milicyja zatrymała ŭ Maładziečnie aktyvista Alesia Abramoviča. Jon znachodzicca ŭ kryminalna-vykanaŭčaj inśpiekcyi.
U Viciebsku zatrymany Aleh Barazna. Jaho zatrymali supracoŭniki milicyi padčas ustalavańnia pałatki dla zboru podpisaŭ. Paviedamlajecca, što źnikli Sałamanienka i Iljaniec.
U Minsku na płoščy Jakuba Kołasa supracoŭnik DAI zatrymaŭ kiroŭcu, jaki sihnaliŭ u padtrymku akcyi.
U Homieli zatrymali błohiera Ivana Remiazoŭskaha. Jon — sirata, viadzie Yotube-kanał «RealBelarus», niadaŭna adbyŭ 15 sutak za akcyju salidarnaści ź Siarhiejem Cichanoŭskim 7 traŭnia ŭ Homieli. «Jaho schapili milicyjanty, jak tolki jon vyjšaŭ z domu, pavieźli ŭ Navabielicki RAUS», — paviedamiŭ «Radyjo Svaboda» błohier Arciom Šaparaŭ.
U Minsku zatrymany lidar «Maładoha frontu» Dzianis Urbanovič. Źnikła suviaź z aktyvistkaj Irynaj Cap.
U Homieli prykładna a 12.00 była zatrymanaja Naryskina Śviatłana. Žančynu dastavili ŭ Centralny RAUS. Chutčej za ŭsio zatrymańnie źviazanaje ź jaje ŭdziełam u akcyi ŭ padtrymku Cichanoŭskaha 7 maja.
U Breście prykładna ŭ 16.40 zatrymany AMAPam Anatol Danilkievič za bieł-čyrvona-bieły ściah.
U Minsku zatrymany Jaŭhien Hormaš, jaki kryčaŭ «Hańba» na supracoŭnika DAI, jaki afarmlaŭ pratakoł na kiroŭcu. Spačatku jaho sprabavali zatrymać supracoŭniki DAI, ale narod adbiŭ jaho. Potym jaho ŭsio ž zatrymali ŭ dvarach supracoŭniki ŭ cyvilnym.
Pa videa, jakim aktyvist «Maładoha frontu» Vital Tryhubaŭ paśpieŭ padzialicca ŭ Facebook, bačna, jak zatrymlivajuć Vitala, a taksama aktyvistaŭ Andreja Vojniča i Maksima Viniarskaha. Mikraaŭtobus spyniŭ taksi, dzie jechali aktyvisty, zatym pačałosia zatrymańnie.
