Dekłaracyja źmieščanaja na sajcie pretendenta ŭ prezidenty. Viktar Babaryka prosić inšych pretendentaŭ dałučycca da jaje.
Tekst dekłaracyi hučyć tak:
«Ja, hramadzianin Respubliki Biełaruś. I ja sapraŭdy maju prava abirać i być abranym.
I pavodle Kanstytucyi, i pavodle sumleńnia.
Śćviardžać, što ja za kahości prahałasuju ci nie prahałasuju, maju prava tolki ja. Ja nie chaču, kab u dačynieńni da majho mahčymaha vybaru rabilisia zajavy, jakija dyskryminujuć ludziej pa hiendernaj, nacyjanalnaj abo prafiesijnaj prykmiecie.
Ja chaču i maju prava na sumlennyja vybary, svabodnyja ad nieprystojnych i pravakacyjnych pavodzinaŭ.
Ja mahu i pavinien zrabić usio, kab zabiaśpiečyć svajo prava na vybar. Ja nie chaču, kab mianie prymušali hałasavać ci stavić za kahości podpis. Nie chaču čuć abraz abo pahroz u bok pretendentaŭ na pasadu prezidenta i nie chaču bačyć realizacyju hetych pahroz, asabliva z dapamohaj pravaachoŭnych orhanaŭ. Ja nie chaču čuć hałasłoŭnych abvinavačvańniaŭ pretendentaŭ u złačynstvach abo parušeńniach: kali heta praŭda, ja chaču, kab usie viadomyja fakty ab pravaparušeńniach nieadkładna pieradavalisia ŭ pravaachoŭnyja orhany dla raspačynańnia kryminalnych spraŭ abo admovy ŭ rehistracyi kandydata ŭ prezidenty.
Ja viedaju, što moj abaviazak pierad hramadstvam — paviedamlać ab parušeńniach pravoŭ na sumlenny vybar.
Ja razumieju svaju adkaznaść i nie dapušču niesumlennych vybaraŭ i niezakonnych pavodzinaŭ ni ŭ dačynieńni da siabie, ni ŭ dačynieńni da svaich siabroŭ, rodnych i znajomych.
Ja viedaju, što abaviazak hramadstva i moj asabisty abaviazak — padtrymać kožnaha prystojnaha hramadzianina, jaki skazaŭ praŭdu i sutyknuŭsia ź pieraśledam.
Kožny maje prava na biaśpieku, i nie pavinien turbavacca za svajo žyćcio abo žyćcio svaich blizkich pry realizacyi vybarčych pravoŭ.
Što asabista ja mahu i pavinien zrabić?
Paviedamić
- kali majo načalstva prasiła mianie ŭ pracoŭny čas pakinuć za kahości podpis;
- ab lubym fakcie prymusu (pahroza zvalnieńniem, pazbaŭleńniem premii, drennaja adznaka i h. d.) z metaj paŭpłyvać na maje vybarčyja pravy;
- ab lubym fakcie podkupu (prapanova premii, pavyšeńnia, miescy ŭ internacie i h. d.) z metaj paŭpłyvać na maje vybarčyja pravy;
— ab vypadkach skažeńnia dziaržaŭnaj statystyki, utojvańnia ad hramadstva praŭdzivych źviestak ab situacyjach, jakija pahražajuć biaśpiecy, u tym liku ab sanitarnaj situacyi.
Dapamahčy svaimi dziejańniami i časam
— padtrymać podpisam pa maim vybary ŭsich asob, jakija vyłučajucca ŭ kandydaty ŭ Prezidenty;
- vystupić vałancioram, kab svaimi viedami i dośviedami dapamahčy tym kandydatam, jakim ja chaču;
- pahadzicca na vyłučeńnie ci padtrymać vyłučeńnie ŭ siabry ŭčastkovych rajonnych vybarčych kamisij samych pavažanych ludziej;
- udzielničać u schodach vybarščykaŭ, vykazvać svajo mierkavańnie;
- pahadzicca być naziralnikam i pierakanacca ŭ tym, što vybary sumlennyja i zakonnyja.
Dapamahčy svaimi resursami
— padtrymać tych, kaho buduć niezakonna i niespraviadliva pieraśledavać;
- padtrymać tych hramadzian, jakija achviarujuć svaim časam i resursami dla realizacyi majho prava na sumlenny vybar».
Viktar Babaryka prosić usich patencyjnych kandydataŭ u prezidenty vykazać svaju salidarnaść i dałučycca da ahučanych pryncypaŭ dla arhanizacyi sumlennaj i svabodnaj kampanii.
Taksama jon prosić padtrymać dekłaracyju ŭsich hramadzian Respubliki Biełarusi, a asabliva — siabraŭ vybarčych kamisij, supracoŭnikaŭ pravaachoŭnych orhanaŭ, dziaržaŭnych słužboŭcaŭ.
«U paniadziełak, 1 červienia 2020 hoda, my padajem zajavy ab viadomych faktach parušeńnia zakanadaŭstva ŭ śfiery ŭdziełu administracyi ŭ zbory podpisaŭ, podkupu, prymusu vybarščykaŭ. Prosim paviedamlać pra ŭsie takija fakty! Jak tolki my atrymajem infarmacyju, my dapoŭnim svoj zvarot. Praŭdu kazać lohka i pryjemna — čym bolš hramadzian raskažuć pra fakty parušeńnia zakanadaŭstva, tym čyściejšyja buduć vybary.
My zaklikajem ludziej, jakich prymušajuć stavić podpisy, zajaŭlać pra pravaparušeńni adkryta. Kali vas zvolniać abo pazbaviać premii, my budziem arhanizoŭvać jurydyčnuju, finansavuju i inšuju padtrymku.
Nami budzie arhanizavanaja pramaja telefonnaja linija, prapanavanyja formy zajavaŭ ab parušeńniach, arhanizavana dapamoha ŭ padačy zajaŭ. Kali kaho-niebudź z vas buduć pieraśledavać, my źviažam vas z tymi, chto moža dapamahčy. Zaklikajem dapamahać adzin adnamu i nie bajacca dziejničać zakonna», — havorycca ŭ zvarocie.
