31 maja biełaruskija pravaabaroncy raspaŭsiudzili zajavu z zaklikam nieadkładna vyzvalić Siarhieja Cichanoŭskaha.
«30 traŭnia 2020 h. padčas praviadzieńnia pikietu pa zbory podpisaŭ hramadzian u padtrymku vyłučeńnia ŭ jakaści kandydata ŭ Prezidenty Respubliki Biełaruś Śviatłany Cichanoŭskaj, jaki adbyvaŭsia ŭ h. Hrodna, supracoŭnikami milicyi byŭ zatrymany kiraŭnik inicyjatyŭnaj hrupy, błohier papularnaha YouTube kanała «Strana dla žiźni» Siarhiej Cichanoŭski i jašče, jak minimum 15 hramadzian, jakija prymali ŭdzieł u dadzienym pikiecie, — havorycca ŭ zajavie.
Pavodle infarmacyi žurnalistaŭ, jakija niepasredna prysutničali pry praviadzieńni pikieta i viali anłajn-tranślacyju, pikiet adbyvaŭsia mirna, biez parušeńniaŭ hramadskaha paradku, u adpaviednaści z patrabavańniami art. 45.1 VK Respubliki Biełaruś.
Zatrymańnie adbyłosia paśla jaŭna niezakonnaha ŭmiašalnictva supracoŭnikaŭ milicyi ŭ kamunikacyju hramadzian z kiraŭnikom inicyjatyŭnaj hrupy S. Cichanoŭskim.
30 traŭnia z telehram-kanała pres-sakratara MUS stała viadoma ab uzbudžeńni kryminalnaj spravy pa fakcie hvałtu ŭ dačynieńni da supracoŭnikaŭ orhanaŭ unutranych spraŭ, udzieł jakim nibyta prymaŭ S. Cichanoŭski i inšyja zatrymanyja. Na dadzieny momant viadoma, što Cichanoŭski i jašče siamiora zatrymanych nachodziacca ŭ IČU h. Minska.
Padziei, jakija papiaredničali zatrymańniu — zajavy dziejučaha kiraŭnika dziaržavy A. Łukašenki padčas naviedvańnia MTZ na adras Cichanoŭskaha, sproba pieraškodzić i stvaryć kanfliktnuju situacyju na pikiecie z boku niekalkich žančyn, niezakonnaje ŭmiašalnictva i zatrymańnie S. Cichanoŭskaha supracoŭnikami milicyi, demanstratyŭnaje padzieńnie na ziamlu milicyjaniera i nastupnaja reakcyja na incydent dziaržaŭnych ŚMI, dazvalajuć zrabić vysnovu ab tym, što ŭ dačynieńni da S. Cichanoŭskaha mahła być ździejśnienaja pravakacyja.
Analiz videazapisaŭ padziejaŭ i śviedčańniaŭ vidavočcaŭ dazvalajuć zrabić vysnovy ab adsutnaści padstavaŭ dla zatrymańnia S. Cichanoŭskaha, pieraličanych va UPK Respubliki Biełaruś, što śviedčyć ab advolnym i niezakonnym zatrymańni S. Cichanoŭskaha.
Varta nahadać, što heta nie pieršy vypadak pieraśledu S. Cichanoŭskaha za mirnuju realizacyju im svabody mirnych schodaŭ, vykazvańnia mierkavańnia i raspaŭsiudu i zboru infarmacyi.
…Pieraličanyja vyšej fakty dazvalujać zrabić vysnovy ab najaŭnaści palityčnaha matyva ŭ boku ŭładaŭ u pieraśledzie S. Cichanoŭskaha, skiravanych na niedobraachvotnaje spynieńnie abo źmianieńnie jahonaj publičnaj dziejnaści.
…Heta dazvalaje nam zajavić, što kryminalny pieraśled S. Cichanoŭskaha źjaŭlajecca palityčnamatyvavanym, a sam S. Cichanoŭski palityčnym źniavolenym.
U suviazi z hetym, my pradstaŭniki biełaruskich pravaabarončych arhanizacyj, patrabujem ad uładaŭ Biełarusi:
- Nieadkładnaha vyzvaleńnia S. Cichanoŭskaha i spynieńnia kryminalnaha pieraśledu ŭ dačynieńni da jaho;
- Vyzvaleńnia i spynieńnia kryminalnaha pieraśledu ŭ dačynieńni da inšych zatrymanych za ŭdzieł ŭ pikiecie 30 traŭnia 2020 h. hramadzian, kali jany niepasredna nie ździajśniali hvałtoŭnych dziejańniaŭ u dačynieńni da supracoŭnikaŭ milicyi», — adznačajecca ŭ zajavie.
