U Pałacy Respubliki prymusova i ŭ pracoŭny čas źbirali podpisy za Łukašenku. Pavodle dyrektara Pałaca, źbiraŭ podpisy namieśnik staršyni prafkamu z ułasnaj inicyjatyvy. Praviedzieny razbor, inicyjatar zboru podpisaŭ zvolnieny, pierad supracoŭnikami vybačylisia, paviedamlaje Svaboda.
Radyjo Svaboda atrymała aŭdyjozapis schodu ŭ Pałacy Respubliki, dzie ŭ pracoŭny čas idzie zbor podpisaŭ za Alaksandra Łukašenku. Pavodle słovaŭ zborščyka, jon «vykonvaje rasparadžeńnie dyrektara».
Na aŭdyjostužcy, jakuju dasłali na Svabodu, mužčynski hołas stavić zadaču: «Kožny z vas pavinien unieści dadzienyja, pastavić podpis, kab hetyja śpisy addać va Ŭpraŭleńnie spraŭ administracyi prezydenta. Kab pakazać, što ŭ nas samaja šmatlikaja słužba patryjotaŭ u Respublicy Biełaruś».
Na stužcy čuvać piarečańni: «Vy paśviedčańnie na prava zboru podpisaŭ majecie?», «Kažuć, u pracoŭny čas heta nielha rabić, tolki ŭ volny», «Heta parušeńnie zakonu».
Na hetyja repliki mužčyna adkazvaje: «Ja vykonvaju rasparadžeńnie dyrektara. Tamu, kali niejkija pytańni da mianie, ja pieranakiroŭvaju vas da dyrektara». «Chto nia pamiataje svaje pašpartnyja dadzienyja, jany jość u adździele kadraŭ».
Razdajucca vokličy: «Heta što, prymusova?» «Ja naahuł nie chaču nidzie ŭdzielničać».
«Dobra, ty volny. Ale pamiatajcie: vy pracujecie ŭ arhanizacyi, padparadkavanaj Kiraŭnictvu spraŭ administracyi prezydenta».
«Vy nam pahražajecie?» — pytajucca žančyny. Idzie słoŭnaja pierapałka. Potym žartački: «A asadku daścio?» — «Navat nalju, dadzienyja pašparta jość» — adkazvaje zborščyk podpisaŭ.
Na aŭdyjostužcy vyrazna čuvać proźviščy: Litoŭčanka, Mastoŭski…
Iryna Litoŭčanka pracuje načalnikam słužby pastanovačnaha aśviatleńnia. Svaboda datelefanavałasia joj. Iryna Paŭłaŭna śćviardžaje, što jaje na hetym schodzie nie było. Čamu tam hučała jaje proźvišča, žančyna nia viedaje.
«Moža, chtości kahości i źbiraŭ. Ale mianie tam dakładna nie było. «Bieź mianie mianie ažanili»», — žartuje Iryna Litoŭčanka.
«Ciapier naahuł mała ludziej na pracy, mnohija syšli ŭ adpačynki za svoj košt z pryčyny karanavirusu i admieny kancertaŭ dy inšych masavych mierapryjemstvaŭ. Na planerki źbirajemsia ŭ Małoj zali, siadajem na adlehłaści adzin ad adnaho», — kaža spadarynia Litoŭčanka.
Dyrektar Pałaca Respubliki Maksim Prychadoŭski spačatku doŭha tłumačyŭ, što ŭ jahonaj ustanovie niama inicyjatyŭnych hrup nijakich kandydataŭ. A pastavić podpis za taho ci inšaha kandydata — heta asabistaja sprava i prava kožnaha.
«Nijakimi prymusami my nie zajmajemsia, a zajmajemsia arhanizacyjaj kancertaŭ i vidoviščnych mierapryjemstvaŭ, na pracoŭnych miescach ludzi pavinny zajmacca pracaj», — kaža spadar Prychadoŭski.
Što da kankretnaha vypadku, jaki zdaryŭsia ŭ Pałacy Respubliki, Maksim Anatolevič usio ž akazaŭsia «ŭ kursie».
«Ja razumieju, pra što vy kažacie. My praviali razbor, hety čałaviek užo zvolniŭsia. Jon byŭ namieśnikam kiraŭnika prafsajuzaŭ, sam sabraŭ ludziej — heta była jahonaja asabistaja inicyjatyva, a nie ŭkazańnie źvierchu. Jon čałaviek staroj farmacyi: «My padtrymlivajem», i ŭsio ŭ takim duchu. Dla mianie niepryjemnaja hetaja historyja.
Što tyčycca supracoŭnikaŭ, jakija prysutničali, ja asabista ź imi sustrakaŭsia i prynios im vybačeńni», — skazaŭ dyrektar Pałaca Respubliki.
Inicyjatar zboru podpisaŭ užo zvolnieny — pa ŭłasnym žadańni, paviedamiŭ dyrektar.
«Nie było administracyjnaha zvalnieńnia, čałaviek na pensii. Nijakich zachadaŭ da jaho nie ŭžyvali. Jon zvolniŭsia pa ŭłasnym žadańni», — zapeŭniŭ Svabodu dyrektar Pałaca Respubliki.
Na pytańnie, kudy padzielisia podpisy, jakija sabraŭ były namieśnik staršyni prafkamu, Maksim Prychadoŭski adkazaŭ tak:
«Ja miarkuju, nikudy podpisy nie pajšli. Udakładniu hetaje pytańnie».
Staršynia prafkamu Pałaca Respubliki Lilija Šykier skazała Svabodzie, što jana pieršy raz čuje, što byŭ taki schod pa zbory podpisaŭ. I dadała, što namieśnica ŭ jaje žančyna, a ŭsiaho ŭ prafsajuznym kamitecie 11 čałaviek. Pa hołasie jana byccam by nikoha nie apaznała.
Liderka prafsajuzu paabiacała ŭ paniadziełak sabrać pasiedžańnie prafkamu.
Svaboda ŭsio ž spadziajecca vyśvietlić, što za čałaviek źbiraŭ podpisy ŭ pracoŭnym kalektyvie Pałaca Respubliki.
