Prafsajuzy i BRSM zładzili pikiet u Minsku, jaki pavinien byŭ zaśviedčyć vialikuju padtrymku siarod ludziej Alaksandra Łukašenki, a na spravie ž prysutnyja navat nie mahli ŭciamna patłumačyć, čamu padtrymlivajuć mienavita hetaha kandydata.
Usie troje chłopcaŭ na fota zrabili vyhlad, što hłuchaniamyja, kali zadavalisia pytańni. I adviarnulisia, kali ich fotkali.
Stancyja mietro «Uschod». Placoŭka la handlovaha centra «Dana Moł». Dźvie čyrvona-zialonyja pałatki, šeść punktaŭ zboru podpisaŭ. Hraje hučna muzyka. Niejkaja salanka z usiaho na śviecie: i patryjatyčnych śpievaŭ pra siniavokuju, i «mokrych krosaŭ» Cimy Biełaruskich. Muzyka hučyć tak mocna, što pačuć niešta, navat znachodziačysia pobač, amal niemahčyma.
Niekalki čyrvona-zialonych ściahoŭ. Paru stałoŭ dla hulniaŭ u nastolny futboł i chakiej. Tancy ad beersemaŭcaŭ. Tak prachodziŭ pieršy pikiet u padtrymku Alaksandra Łukašenki ŭ Minsku.
Ludzi źjavilisia ź niadkul. I adrazu ŭtvaryli čarhu. Ciaham dvuch z pałovaj hadzin niekalki sotniaŭ čałaviek stajali pad soncam, kab pakinuć svoj podpis za Łukašenku. Mabyć, heta ŭsio idejnyja ludzi, kali hatovyja achviaroŭvać časam. «NN» papytałasia, čamu jany pryjšli na hety pikiet.
***
«Vykazvaju svaju hramadzianskuju pazicyju».
«NN»: A čamu staicie mienavita za Łukašenku?
«Mnie tak chočacca»
«NN»: Patłumačcie, čym vam padabajecca kandydat?
«Stabilnaść, upeŭnienaść».
***
«A chto vy ŭvohule taki?»
«NN»: Dźmitryj Pankaviec, «Naša Niva».
«Nu i, kali łaska, pracujcie dalej».
«NN»: Dyk ja pracuju: raskažycie, čamu mienavita hety kandydat?
«Heta majo asabistaje».
U razmovu ŭstupaje susiedka.
«My za ceły dzień tak nahavarylisia».
«Kali čałaviek staić, to jon razumieje, za što staić. I pytańni tut lišnija. U kožnaha svaja pazicyja».
«NN»: Dyk patłumačcie jaje.
«A ja nie chaču».
«NN»: Vam soramna?
«Nie, kali było b soramna, to siudy b nie pryjšła. Usio».
«NN»: Čamu vy chavajeciesia ad fota?
***
«NN»: Možacie raskazać, čamu siudy pryjšli?
«Nie».
«NN»: Čamu nie?
«Biez kamientaroŭ».
***
«Našto vam heta viedać?»
«NN»: Cikava ž.
«Heta moj hramadzianski doŭh. Prajaŭlać aktyŭnuju hramadzianskuju pazicyju. Hałasavać».
«NN»: Čamu hety kandydat?
«Mianie zadavalniaje jon. U nas u krainie ŭsio cicha».
«NN»: Vy student?
«Nie, ja pracuju kiroŭcam tralejbusa».
«NN»: Vas zadavalniaje vaš zarobak?
«Tak, całkam».
***
«Pryjšli padtrymać».
«NN»: Mienavita hetaha kandydata?
«A čamu nie?»
«NN»: 26 hadoŭ va ŭładzie — heta nie mnoha?
«Nie».
«NN»: Ja ŭčora na BT bačyŭ, kali tłumačyli adstaŭku Rumasa, to skazali, što čałaviek, jaki pracuje šmat hadoŭ na adnoj pasadzie, zasiedžvajecca i nie moža dobra vykonvać pracu. A vaš kandydat moža?»
«Ja dumaju, nie».
***
«NN»: Čamu vy tut?
«Skazaŭ pryjści načalnik».
«NN»: Vy tut tolki tamu, što tak skazaŭ načalnik?
«U pryncypie, tak».
«NN»: A dzie vy pracujecie?
«Miedycynski ŭniviersitet».
«NN»: Šmat tut vašych?
«Vielmi šmat».
***
«Ja pryjšła, bo tak zachacieła. A vy čaho pryjšli?»
«NN»: Pracavać pryjšoŭ.
«Nu dyk pracujcie. Ja chaču pastavić podpis za Łukašenku».
«NN»: A čym jon vam padabajecca?
«Nie skažu».
«NN»: Heta sakret?
«Padabajecca jon nam».
«NN»: A čym? Vusami?
«Čamu ja vam pavinna adkazvać? Unutrany hołas tak kaža».
«NN»: A jak vam inšyja kandydaty. Babaryka?
«Taksama charošy mužyk».
«NN»: A Capkała?
«Taksama charošy».
«NN»: Usie charošyja?
«Tak, usie charošyja».
***
«Ja suprać majdanu, suprać vajny».
«NN»: A chto z kandydataŭ za majdan?
«Budzie majdan. Moj muž hramadzianin ES, Łatvii. I ja viedaju, što tam chacieli pieramien, ale lepš žyć nie stała. Nazavicie choć adnu krainu, dzie žyć stała lepiej?»
«NN»: U Estonii, naprykład. Tam zarobki ŭžo bolš za 1000 jeŭra.
«Dy što vy kažacie! U mianie śviakrucha pamierła, taki rachunak vystavili z kliniki. Ja takoha nie chaču».
«NN»: Jak vam Babaryka?
«Mnie nie spadabaŭsia jahony dom».
«NN»: A Capkała?
«Capkała? A što jon?»
«NN»: Park vysokich technałohij.
«Ad dabra dabra nie šukajuć».
«NN»: 26 hadoŭ — heta nie mnoha?
«Heta vielmi mała».
***
«Ja nie daju kamientaroŭ. Heta majo asabistaje mierkavańnie. Ničoha ja nie chaču».
«NN»: Vam tolki Łukašenka padabajecca. A Babaryka nie?
«Nie».
«NN»: Čamu?
«Prosta nie, i ŭsio. Ja svoj vybar zrabiła».
«NN»: Capkała tak doŭha pracavaŭ razam z vašym kandydatam. Moža, dobry čałaviek?
«Moža być, ja ź im nieznajomaja».
«NN»: A z Alaksandram Ryhoravičam znajomyja?
«Našmat bližej».
«NN»: Čym jon vam usio ž tak padabajecca?
«Padabajecca, što ja žyvu ŭ stabilnaj dziaržavie, niezaležnaj. Stabilna atrymlivaju dastatkova vysoki zarobak».
«NN»: Što dla vas stabilnaść?
«Mir».
***
«NN»: Možacie raskazać…
«Kazku?»
«NN»: Nie, praŭda, što tut robicie?
«Staju. Słuchajcie, adydzicie adsiul».
«NN»: Čamu Łukašenka?
«Što vy da ludziej prystajacie? Davaj adsiul».
***
«NN»: Vam padabajucca Babaryka ci Capkała?
«Mianie zadavalniaje całkam, što robicca ŭ našaj krainie».
***
«NN»: Vy idejny čałaviek, kali pryjšli siudy pad soncam. Raskažycie pra svaju pazicyju.
«Ničoha ja vam nie skažu».
***
«Małady čałaviek, niepryhoža prystavać da žančyn, idzicie prystavajcie da svajho połu».
«NN»: Čamu vy nie chočacie raskazać, čym taki dobry vaš kandydat?
«Dzień byŭ kiepski».
«NN»: Dyk my ž vas nie pra kiepskaje pytajemsia, a pra dobraje, pra čałavieka, jakoha vy padtrymlivajecie.
«Nie leźcie siudy».
***
«NN»: Vam tolki Łukašenka padabajecca?
«Chto vam skazaŭ? Nam usie padabajucca».
***
«NN»: Možacie skazać, čamu siudy pryjšli?
«Nie padychodź blizka».
«NN»: Ja ŭ mascy, vy ŭ mascy. Dystancyju zachoŭvaju.
«Ty chvory? Vali adsiul».
***
«NN»: Čamu vy tut staicie?
«Zachacieŭ».
«NN»: Vam padabajecca hety kandydat?
«A što, nie pavinien?»
«NN»: Dy, kali łaska, patłumačcie tolki.
«Ja abaznačyŭ, što nie chaču adkazvać na pytańni».
***
«NN»: Što vy tut robicie?
«Paprasili, čarhu trymaju svaim».
«NN»: Z pracy paprasili?
«Nie važna. Staju i staju».
«NN»: Vam prezident padabajecca?
«Mnie Biełaruś padabajecca».
«NN»: A Capkała i Babaryka?
«Usie ščyryja i addanyja ludzi padabajucca».
