Padčas pikieta ŭ Minsku 7 červienia zatrymali dvuch chłopcaŭ — Alaksieja Viściaža i Dźmitryja Ražkova. Abodva — pieramožcy mižnarodnych studenckich alimpijad pa prahramavańni, brali ŭdzieł u spabornictvach jak studenty BDUIR, piša «Radyjo Svaboda».
22-hadovy Alaksiej Viściaž ź Iŭja, ciapier pracuje ŭ Minsku ŭ adnoj ź firmaŭ, tamu va ŭniviersitecie na trecim kursie ŭziaŭ akademičny adpačynak.
«Alaksiej zapatrabavany na pracy. Jon z 8-ha kłasa braŭ udzieł u alimpijadach. Na alimpijadzie ŭ Kazachstanie zavajavaŭ bronzavy miedal, u Tajvani srebny miedal. Na čempijanacie śvietu pa prahramavańni ŭ Tajłandzie zaniali z chłopcami 17 miesca, na čempijanacie ŭ Amierycy — 23 miesca. Ale trapić tudy było vielmi składana, tam vielmi vialiki konkurs. Tam na alimpijadzie byŭ i Dźmitry Ražkoŭ. Chłopcy vielmi talenavityja», — kažuć svajaki Alaksieja.
Pra zatrymańnie Alaksieja jany daviedalisia ad siabra. Apošni raz dasiažny jon byŭ a 16-j hadzinie 7 červienia.
«Nam skinuli fotazdymak, jak ich zatrymlivali, jany išli kala handlovaha centra «Siłuet», nikoha nie čapali, nie maciukalisia. Padbiehli dziesiać čałaviek i zatrymali. Jany nidzie nie vystupali, nie kryčali, išli dachaty. Takoha biaspraŭja nie pavinna być, kožny maje prava vykazacca. Ja suprać takich represij, zatrymańniaŭ. Kožny maje prava hołasu», — kaža svajak chłopca.
Alaksieja zatrymali ŭpieršyniu, raniej jon i nie chadziŭ na takija pikiety.
Svajaki kažuć, što Alaksiej paviazaŭ bieł-čyrvona-bieły ściah na plečy. Siońnia jaho pavinny sudzić praz Skype paśla 14.00 (sud Pieršamajskaha rajona). Alaksiej siabruje ź Dźmitryjem Ražkovym sa Žłobina, jaki zakančvaje ŭniviersitet i źbirajecca vučycca dalej u mahistratury.
