Fota Nadziei Bužan
Balnaja sistema nie patrapić u novy Kodeks ab administracyjnych pravaparušeńniach. Pra heta ŭ efiry telekanała «Biełaruś 1» raspaviała Volha Čuprys, namieśnik kiraŭnika Administracyi prezidenta, piša Tut.by.
Pavodle jaje słoŭ, novaŭviadzieńnie, jakoje było prapanavana Dziaržaŭtainśpiekcyjaj, nie prajšło hramadskaje abmierkavańnie - suprać pryniaćcia novaj sistemy vykazałasia bolšaść udzielnikaŭ darožnaha ruchu. Adnak kala 30% byli «za», tamu ŭ budučym pry dapracoŭcy sistema moža atrymać zamacavańnie ŭ nastupnych kodeksach.
— Prezidentu dakładvajuć varyjant biez balnaj sistemy, u tym ža vyhladzie, u jakim raniej ŭžyvalisia normy datyčnyja adkaznaści za PDR, za niekatorymi vyklučeńniami. Naprykład, ŭzmacnieńnie žorstkaści za kiravańnie transpartnym srodkam u stanie ałkaholnaha apjanieńnia, — raspaviała Čuprys.
Jak prapanoŭvali «vychoŭvać» kiroŭcaŭ
Sutnaść była prostaja: za kožnaje parušeńnie PDR kiroŭca atrymlivaje štrafnyja bały. Kali naźbiraje ich 10 ci bolš - pazbaŭlajecca pravoŭ na šeść miesiacaŭ. «Adznaka» pavinna była zaležać ad taho, u jakuju katehoryju traplaje kankretnaje parušeńnie. Nahadajem, prajektam Kodeksa praduhledžana novaja hradacyja pravaparušeńniaŭ.
Tak, 1 bał daduć za tak zvany administracyjnuju pravinu — heta ŭsio, za što treba vypisać štraf da 10 bazavych vieličyń. Naprykład, niepryšpileny remień, jazda biez TA, razmova pa mabilniku za rulom i hetak dalej.
2 bały — za značnaje administracyjnaje pravaparušeńnie (toje, dzie štraf bolš za 10 bazavych vieličyniaŭ). Zychodziačy z prapanavanaj redakcyi KoAP, stolki možna zarabić, da prykładu, za pieravyšeńnie chutkaści bolš čym na 40 kiłamietraŭ u hadzinu.
3 bały naličać za hrubaje administracyjnaje pravaparušeńnie (heta tyja parušeńni, dzie pry paŭtornym ich ździajśnieńni nadychodzić kryminalnaja adkaznaść, a taksama tyja, za jakija moža być nakładzieny aryšt). Naprykład, paŭtornaja jazda za rulom biez pravoŭ abo pieradača mašyny takoj asobie.
Pry hetym, zrazumieła, adkaznaść za sami parušeńni — štrafy i pazbaŭleńnie pravoŭ — nie admianiajucca.