U Biełarusi zaviaršyŭsia testavy etap stvareńnia sietki elektrazapravačnych stancyj, kali zaradzić elektramabil možna było biaspłatna. U lipieni «Biełarusnafta» uvodzić taryfy na zaradku na svaich stancyjach Malanka. Jak zapeŭnili Tut.by u kampanii, košt elektraenierhii budzie samym nizkim u paraŭnańni ź jeŭrapiejskimi krainami — prykładna 30-40 kapiejek za 1 kVt·hadz.
Z 15 červienia da 31 śniežnia 2025 hoda pry ŭvozie na terytoryju Biełarusi elektramabilaŭ dla asabistaha karystańnia nie treba budzie płacić padatak na dadanuju vartaść.
«Zaradka elektramabilaŭ była biaspłatnaj ad 2014 hoda, pakul my pracavali ŭ testavym režymie, — nahadaŭ namieśnik dyrektara «Biełarusnafty» Andrej Kocik. — Pačatkovy etap my zavieršyli: Malanka pracuje va ŭsich rehijonach, na ŭsich mahistralach. Abstalavana bolš za 260 stancyj, što dastatkova dla absłuhoŭvańnia tysiač elektramabilaŭ. I łahična pierachodzim da nastupnaha etapa — ekanamična abhruntavanaha raźvićcia. Navat firmiennyja stancyi Tesla, jakija ŭ pieryjad stanaŭleńnia byli biaspłatnyja, ciapier robiać pasłuhu za hrošy».
Pa słovach pradstaŭnika «Biełarusnafty», elektrapaliva budzie ŭdvaja tańniejšaje za bienzin. Tak, poŭnaja zaradka elektrakara Nissan Leaf ź jomistaściu batarei 24 kVt/h abydziecca ŭładalniku ŭ 7-9 rubloŭ. Hetaha zapasu chopić, kab prajechać 150 kiłamietraŭ. Aŭtamabil z ruchavikom unutranaha zharańnia vydatkuje na pieraadoleńnie takoj ža adlehłaści kala 10 litraŭ paliva (18-20 rubloŭ).
Nievysokuju canu, jak ličyć Andrej Kocik, možna budzie trymać dziakujučy elektraenierhii ź BiełAES.
