Ivan Cierciel 4 červienia ŭznačaliŭ Kamitet dziaržaŭnaha kantrolu. Na hetaj pasadzie jon źmianiŭ ciažkavahavika Leanida Anfimava, jaki ŭznačalvaŭ strukturu amal šeść hadoŭ. I ŭžo praz tydzień Cierciel apynuŭsia ŭ centry hučnaj kryminalnaj spravy Biełhazprambanka.

Ivan Cierciel. Fota sb.by

Ivan Cierciel. Fota sb.by

Mienavita viedamstva Cierciela viadzie hetuju spravu, a sam kiraŭnik ahučvaje dla dziaržaŭnych ŚMI jaje padraźbiaznaści.

«NN» sabrała cikavyja źviestki pra Ivana Cierciela i jahonuju siamju.

Ivan Cierciel naradziŭsia ŭ 1966 hodzie ŭ vioscy Pryvałki Hrodzienskaha rajona. Hetaja vioska maje bahatuju historyju. Naležała pasielišča rodu Ahinskich. A ŭ 1792 hodzie, pierad druhim padziełam Rečy Paspalitaj, karol Stanisłaŭ Paniatoŭski nadaŭ Pryvałkam mahdeburhskaje prava i hierb («u ružovym poli archanioł Michał, u pravaj ruce małanki, u levaj — ščyt, pad nahami postać djabła siarod ahniu»).

Hierb Pryvałkaŭ

Hierb Pryvałkaŭ

U Pryvałkach pa siońnia bavić letni čas mama Ivana Cierciela Anastazija Kazimiraŭna. «Zimoj ja ŭ Hrodnie, samoj užo ciažka tapić drovami chatu, a na leta siudy pryjazdžaju. Sioleta pozna, tolki ŭ mai pryjechała, raniej u kancy krasavika jašče», — raskazvaje «Našaj Nivie» spadarynia Cierciel.

U siamji Anastazii Kazimiraŭny i Stanisłava Janaviča było dvoje synoŭ-pahodkaŭ: Ivan i Juryj.

Małodšy Juryj — taksama ciapier pry vysokaj pasadzie: jon uznačalvaje Dziaržaŭnuju inśpiekcyju achovy žyviolnaha i raślinnaha śvietu pry prezidencie Biełarusi. Raniej jon uznačalvaŭ Asobnuju słužbu aktyŭnych mierapryjemstvaŭ (ASAM) — pahraničny śpiecnaz.

Juryj Cierciel, fota gosinspekciya.gov.by

Juryj Cierciel, fota gosinspekciya.gov.by

«Syny vučylisia ŭ bazavaj škole tut, u Pryłukach, a skančvali škołu ŭžo ŭ Druskienikach, u Litvie. Ja ž z voknaŭ svajoj chaty baču litoŭskuju viosku, praź Nioman», — raskazvaje mama čynoŭnika.

«Raniej ža nie było hranic. A pa pramoj tut da Druskienikaŭ piać kiłamietraŭ. Jany vychodzili na trasu Hrodna — Vilnia i padsadžvalisia na rejsavyja aŭtobusy, što jechali ŭ Vilniu, Alitus, Kalininhrad. Šmat było aŭtobusaŭ».

A ci viedaje Ivan Cierciel litoŭskuju movu? «U Druskienikach škoła była ruskaja, ale litoŭskuju jany taksama vučyli, trochu ŭmiejuć havaryć, — raskazvaje mama. — U savieckija časy ŭ Vilniu my vielmi časta jeździli: to ŭ mahaziny, to da kaścioła. U nas ža bližej da Vilni, čym da Minska».

Što tyčycca kaścioła, to spadarynia Cierciel kaža, što ŭsia ichniaja siamja — katoliki. Sama žančyna chodzić u kaścioł, tolki ciapier paźbiahaje naviedvańnia chrama ŭ suviazi z karanavirusam.

«Vučylisia dobra. Ja navat nie skažu, jakija pradmiety byli lubimymi — usio lubili. Jak usie, chadzili na rybałku. Sportam zachaplalisia: Juryj navat rajonnaje spabornictva pa nastolnym tenisie vyjhravaŭ.

Jany ž viaskovyja chłopcy, pracy nijakaj nie paźbiahali. Raniej davali ŭ kałhasie buraki na prapołku, to jany i dla škoły prapolać, i dla nas, i dla baby ź dziedam. Ja niadaŭna pieračytvała listy Ivana z vojska, — jon u Tule słužyŭ, — to kožny raz prasiŭ pryvitańnie pieradać babie i dziedu».

Sama Anastazija pracavała ŭsio žyćcio kultrabotnicaj: biblijatekarkaj, a taksama zahadčycaj miascovaha kłuba, chacia vučyłasia ŭ Hrodnie ŭ chimika-technałahičnym technikumie. Ale vyjšła zamuž, viarnułasia na radzimu i źmianiła śfieru. Baćka Ivana Cierciela, Stanisłaŭ Janavič, byŭ kinamiechanikam.

Sioleta budzie 25 hadoŭ, jak Stanisłaŭ Cierciel pamior, jamu było 55 hadoŭ. «Maładym pamior, a jašče va ŭsiu hetuju pierabudovu. Ciažka było, ale syny dapamahli», — kaža Anastazija Kazimiraŭna.

Uvieś rod Ivana Cierciela pachodzić z Pryvałak. «I ja miascovaja, i muž, i baćki našy. Tolki adna babula ŭ mianie była litoŭka, z susiedniaj vioski. A viedajecie, jak majo dziavočaje proźvišča? Viejknier. Moža, niamieckaje, chto jaho viedaje, ale my ŭsie miascovyja. I pa pašparcie ja nie Anastasija, a Anastazija. Kali kudy prychodžu, to zaŭsiody pierapytvajuć, jak imia».

Vučycca Ivan Cierciel pajechaŭ u Razań, u vyšejšaje pavietrana-desantnaje kamandnaje vučylišča. U Biełarusi skončyŭ Instytut nacyjanalnaj biaśpieki. Ad 1993 hoda słužyŭ u Pahraničnym kamitecie (savieckaja spadčyna, kali pahraničniki byli pryviazanyja da KDB).

U 2008 hodzie Ivan Cierciel staŭ namieśnikam staršyni KDB i prabyŭ na hetaj pasadzie až da 2020 hoda. Heta redkaść pry ciapierašniaj sistemie ratacyi kadraŭ.

Ivan Cierciel žanaty.

«Žonku jon znajšoŭ na viasielli brata. Jon braŭ dzieŭku ź Lidy sabie. A raniej jak na viasiellach było: utvaralisia pary «družka» i «družban», na ich banty apranali, i jany maładych supravadžali. Dyk voś sa svajoj žonkaj jany byli «družka» i «družban», tak pasiabravali, pierapisvalisia, a potym ažanilisia. Jana taksama ź Lidy. Niaviestki ŭ mianie dobryja».

U Ivana Cierciela adzin syn Mirasłaŭ. Jon vučyŭsia na fakultecie mižnarodnych adnosin BDU. Žanaty, dziaciej pakul nie maje.

«Kali syna naznačyli ŭ dziaržkantrol, to ja abradavałasia, ale adnačasova zadumałasia, što praca nialohkaja», — skazała mama čynoŭnika.

Čytajcie: Žanaty druhi raz, syn piša vieršy pa-biełarusku: što viadoma pra siamju novaha premjer-ministra Ramana Hałoŭčanki

Śpiecyjalist pa parazitach: što viadoma pra novaha vice-premjera Alaksandra Subocina

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?