Śviatłana Cichanoŭskaja, fota Nadziei Bužan

Śviatłana Cichanoŭskaja, fota Nadziei Bužan

Cviatłana Cichanoŭskaja zapisała videazvarot ab tym, što joj pastupajuć pahrozy adnosna dalejšaha praciahu ŭdziełu ŭ pieradvybarnaj honcy. Videa Cichanoŭskaja dasłała ŭ redakcyju TUT.BY.

— Ja znachodžusia ŭ Homieli, ja pryjechała siudy, kab pačać zdaču podpisaŭ, sabranych u maju padtrymku, i na parozie adnoj z administracyj mnie pastupiŭ zvanok z pahrozami ŭ moj adras i na adras maich dziaciej z umovaj taho, što ja nie pavinna praciahvać hetuju pajezdku.

Pierada mnoj staić vybar: dzieci abo dalejšaja baraćba, dumaju, moj vybar budzie vidavočny.

Prašu vas z razumieńniem pastavicca da luboha majho rašeńnia. Chaču skazać, što, kali b Siarhiej byŭ na voli, jon by skazaŭ vam nie zdavacca, — skazała Cichanoŭskaja.

Kala 16:00 Śviatłana Cichanoŭskaja paniesła podpisy ŭ administracyju Savieckaha rajona Homiela. Jana zajaviła, što budzie praciahvać udzieł u vybarčaj kampanii, bo «tolki tak ja mahu dapamahčy mužu». Ciapier dzieci Cichanoŭskich u Minsku z maci Śviatłany.

«Tolki tak ja mahu dapamahčy mužu». Cichanoŭskaja zajaviła, što budzie praciahvać kampaniju, niahledziačy na pahrozy

***

Nahadajem, z 24 maja na Kamaroŭcy źbiralisia šmatludnyja čerhi da pikietaŭ Śviatłany Cichanoŭskaj, a taksama da pikietaŭ Viktara Babaryki i Valeryja Capkały. 11 červienia Śviatłana Cichanoŭskaja zajaviła, što zdymaje svaje pikiety pa zbory podpisaŭ u Minsku i abłasnych haradach na 12, 13 i 14 červienia z-za aściarohi, što tam mohuć adbycca pravakacyi ŭ dačynieńni da zborščykaŭ podpisaŭ. Da hetaha było zatrymana bolš za 10 siabraŭ inicyjatyŭnaj hrupy Cichanoŭskaj.

fota Iryny Arachoŭskaj, Biełsat

fota Iryny Arachoŭskaj, Biełsat

Kiraŭnika inicyjatyŭnaj hrupy Śviatłany Cichanoŭskaj Siarhieja Cichanoŭskaha i jašče dzieviać čałaviek zatrymali 29 maja ŭ Hrodnie padčas pikieta pa zbory podpisaŭ. Hetamu papiaredničaŭ incydent, u vyniku jakoha ŭpaŭ milicyjant. Vidavočcy padziej nazvali heta pravakacyjaj, a MUS zajaviła, što zatrymanyja ŭžyli hvałt u dačynieńni da supracoŭnikaŭ milicyi Leninskaha RAUS z metaj pieraškodzić ich zakonnaj dziejnaści.

3 i 4 červienia na leciščy ŭ Cichanoŭskaha pad Homielem i ŭ jaho ofisie ŭ Homieli prajšli pieratrusy. Padčas pieratrusu na leciščy śledčyja znajšli 900 tysiač dalaraŭ. Pieratrus doŭžyŭsia z treciaj hadziny dnia da treciaj nočy. Hrošy śledčyja znajšli kala druhoj hadziny nočy padčas treciaha pieratrusu. Padčas pieršych dvuch ničoha znojdziena nie było.

Biełaruskija pravaabaroncy pryznali Siarhieja Cichanoŭskaha palitviaźniem i zapatrabavali jahonaha vyzvaleńnia.

9 červienia Siarhieju Cichanoŭskamu i jašče siami asobam Śledčy kamitet pradjaviŭ abvinavačvańnie pa č. 1 art. 342 (Arhanizacyja i padrychtoŭka dziejańniaŭ, jakija hruba parušajuć hramadski paradak) Kryminalnaha kodeksa Biełarusi, dziejańni adnaho ź ich dadatkova kvalifikavanyja śledstvam pa art. 364 (hvałt u dačynieńni da supracoŭnikaŭ orhanaŭ unutranych spraŭ) Kryminalnaha kodeksa Biełarusi. Pa «spravie Cichanoŭskaha» ŭ Miensku pad vartaj taksama ŭtrymlivajucca Jaŭhien Roźničenka, Dźmitryj Furmanaŭ, Uładzimir Navumik, Viarhilij Ušak, Alaksandr Aranovič, Vasil Babroŭski i Arciom Sakaŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?