Dzianis Urbanovič.
16 červienia paśla 15 sutak administracyjnaha aryštu ź mienskaha Centru izalacyi pravaparušalnikaŭ na Akreścina vyjšaŭ lider «Maładoha frontu» Dzianis Urbanovič. Jon raskazaŭ Svabodzie, što robicca ŭ Centry izalacyi pravaparušalnikaŭ, kali zatrymlivajuć aktyvistaŭ vybarčaj kampanii.
Čytajcie taksama: U MUS prakamientavali zajavy pra ŭcisk palityčnych aryštantaŭ na Akreścina
«Usim zapraŭlajuć ludzi ŭ cyvilnym. Milicyjanty kidajucca vykonvać lubyja ich zahady»
Pavodle Dzianisa Ŭrbanoviča, spravami ŭ CIPie ŭ hetyja dni kiravali nie milicyjanty, a nieviadomyja supracoŭniki ŭ cyvilnym.
«Jany pavodziać siabie jak haspadary nia tolki ŭ dačynieńni da viaźniaŭ, ale i ź milicyjantami. Luby ich zahad tyja kidajucca vykonvać, jak padnačalenyja. Miarkuju, jany z KDB ci ź jakoj inšaj siłavoj struktury, bo pavodziać siabie nachabna, ich usie bajacca. Ździekujucca ź viaźniaŭ, chamiać, pahražajuć. Ad ich byli takija vyrazy, jakich raniej nikoli nia čuŭ. «Pieratvorym ciabie ŭ ahurok», «Ty siudy trapiŭ, kab pakutavać», «Paviesim ci sam paviesiśsia, i nichto praviarać nia budzie»… Liču, heta na ich zahad u kamerach, dzie jość palityčnyja, padłohu zalivajuć vadoj z chlorkaj», — skazaŭ Dzianis Urbanovič.
Jon kaža, što sam siadzieŭ u takoj kamery, dzie vady było pa ščykałatku, a matracy adabrali, kab viaźni nie mahli adpačyć. Urbanovič zhadaŭ, jak paprasiŭ anuču, kab vycierci z padłohi vadu, ale achoŭniki jamu admovili i ŭ hetym: «Zdymaj štany i vyciraj».
Čamu były viazień miarkuje, što vada z chlorkaj na padłozie — heta nia srodak dezynfekcyi ad karanavirusu, a ździek ź viaźniaŭ?
«Kali pravodzicca dezynfekcyja, prychodziać žančyny i pracirajuć usio admysłovymi srodkami. A vadu z chlorkaj vylivajuć na padłohu, mienavita kab zrabić niespryjalnyja ŭmovy dla viaźniaŭ. Pryčym potym usim inšym aryštantam u kamery kažuć, što heta «praz palityčnych»», — kaža Dzianis Urbanovič.
«Sieviarynca źbili i adabrali ŭ jaho Bibliju»
8 červienia ŭ CIP byŭ źmieščany Pavał Sieviaryniec, a taksama inšyja aktyvisty, jakich zatrymali ŭ suviazi z vybarčaj kampanijaj. Pavodle Dzianisa Ŭrbanoviča, ź imi abychodziacca asabliva žorstka. Ad adnaho z sukamernikaŭ Dzianis Urbanovič pačuŭ, što Paŭła Sieviarynca bili pa nahach, adabrali Bibliju i źmiaścili jaho ŭ chałodny karcer.
«Kali jamu tam daviadziecca siadzieć 75 sutak, nie ŭjaŭlaju, jak jon vytrymaje. Ja niedzie praz 10 dzion u zvyčajnaj kamery straciŭ aryjentacyju, kolki siadžu, kali vychodzić. A tam uvohule žachlivyja ŭmovy», — kaža Dzianis Urbanovič. Pavodle jahonych źviestak, achoŭniki i ludzi ŭ cyvilnym źbivali taksama aktyvista «Eŭrapiejskaj Biełarusi» Maksima Viniarskaha, jaki abviaściŭ haładoŭku.
«U dvoryku čuŭ hołas Volhi Mikałajčyk, a potym jaje niekudy pieraviali. Ź joj taksama vielmi žorstka abychodziacca, nie zvažajuć, što žančyna», — kaža aktyvist.
«Da ściany!», «Stajać!», «Pysu raźviarni!»
Dzianis Urbanovič byŭ śviedkam taho, jak u CIPie abychodzilisia z žančynami ŭ cišotkach z nadpisam «Kraina dla žyćcia».
«Tady ŭ CIPie było šmat amapaŭcaŭ, pryčym jany byli ŭzbrojenyja aŭtamatami. I ludziej u cyvilnym. Jak pryvieźli tych žančyn, ich pačali ahladać. Asabistyja rečy prosta vykidali na ziamlu. Žančyny pačali aburacca, patrabavali, kab ich ahladali supracoŭnicy-žančyny. Ale na ich raŭli, jak na bydła: «Stajać! Da ściany! Pysu raźviarni!» — heta małaja dola, što ja zapomniŭ. Tam byŭ prosta žach», — zhadaŭ Dzianis Urbanovič.
Pra siabie Dzianis Urbanovič kaža, što jaho niekalki razoŭ mocna źbivali, u tym liku pierad sudom bili pa hałavie. Šmat načej zapar u jahonuju kameru pa niekalki razoŭ uryvalisia achoŭniki. Aktyvist miarkuje, što jamu naŭmysna nie davali vyspacca, kab vyvieści z narmalnaha psychalahičnaha stanu, spravakavać na ahresiŭnyja dziejańni.
«Ja ledź trymaŭsia. Navat prostaja prośba vyvieści mianie na prahułku mahła zakončycca źbićciom u kalidory», — kaža Dzianis Urbanovič.
Sa słovaŭ aktyvista, ciapier adnosna viaźniaŭ CIP uviedzienyja samyja roznyja abmiežavańni: im zabaroniena čytać, ich nie vyvodziać na prahułki, niekatorym nie dajuć pieradač.
«Pieršuju maju pieradaču prosta vysypali na padłohu i źniščyli», — kaža aktyvist. Achoŭniki, pavodle aktyvista, asabliva ŭvažliva sočać za tym, kab ciaham dnia viazień nia zmoh narmalna adpačyć. «Matracy na dzień zabirajuć, i albo chadzi pa kamery, albo siadzi na chałodnym žalezie. Navat prychilicca da ściany nielha — adrazu zaskokvajuć u kameru i pahražajuć karceram», — zhadaŭ Urbanovič.
Pra sanitarny stan u kamerach Dzianis Urbanovič skazaŭ hetak:
«Haračaj vady niama, kažuć, nibyta niejki ramont. Šmat u jakich kamerach vošy — mnie taksama daviałosia ich dušyć na adzieńni».
Dzianis Urbanovič skazaŭ, što maje namier skardzicca ŭ prakuraturu na źbićcio, ździeki i nievynosnyja ŭmovy ŭtrymańnia ŭ mienskim Centry izalacyi pravaparušalnikaŭ. «Navat mnie, jaki ŭžo byvaŭ na sutkach, ciapierašni kašmar ciažka było pieražyć. Kości dahetul balać», — zhadvaje aktyvist.
Dazvanicca da dziažurnaha CIP pa kamentar nie ŭdałosia — słuchaŭku prosta nie padniali.
Aficyjny kamentar MUS
Pavodle presavaha sakratara MUS Volhi Čamadanavaj, na siońnia niama nivodnaj skarhi na ŭmovy ŭtrymańnia ci drennaje abychodžańnie ad tych aktyvistaŭ, chto adbyvaŭ u Centry izalacyi pravaparušalnikaŭ administracyjny aryšt i znachodzicca tam ciapier.
«Usio, što jany havorać, nia jość praŭdaj. Niama pahroz žyćciu, rečaŭ u Paŭła Sieviarynca nie adbirali», — skazała Volha Čamadanava.
Pavodle Volhi Čamadanavaj, reahujučy na dopisy ŭ sacyjalnych sietkach, u tym liku ad svajakoŭ zatrymanych, kiraŭnictva MUS praviarała hetyja syhnały, u tym liku prahladalisia kamery nazirańnia, jakija ŭstalavanyja ŭ CIP. Syhnały ab parušeńniach nie paćvierdzilisia.
«Parušeńniaŭ z boku tych, chto tam pracuje, nia vyjaŭlena. Jość unutranyja praviły, jakija musiać vykonvać zatrymanyja, jakich utrymlivajuć u CIP, i ŭsio robicca ŭ miežach hetych praviłaŭ», — skazała Volha Čamadanava.
