Administracyja prezidenta Respubliki Kareja Mun Čže Ina nie budzie tryvać abrazaŭ z boku Pchieńjana ŭ adras paŭdniovakarejskaha lidara, a taksama dziejańniaŭ, skiravanych na eskałacyju napružanaści na Karejskim paŭvostravie. Pra heta było zajaŭlena na bryfinhu ŭ sieradu, piša tass.ru.
U Sieule «bolš nie majuć namier tryvać biezrazvažnyja słovy i dziejańni Poŭnačy», jakija «pryčyniajuć fundamientalnuju škodu» znosinam pamiž lidarami dźviuch krain.
Pradstaŭnik administracyi taksama nazvaŭ «biessensoŭnaj i hrubaj» apublikavanuju ŭ sieradu zajavu pieršaha namieśnika zahadčyka adździeła CK Pracoŭnaj partyi Karei (TPK) Kim Je Čžon, małodšaj siastry lidara krainy Kim Čen Yna. Jana raskrytykavała vystup paŭdniovakarejskaha prezidenta na cyrymonii, pryśviečanaj 20-j hadavinie pieršaha ŭ historyi samitu lidaraŭ dźviuch Karej i padpisańnia sumiesnaj dekłaracyi, nazvaŭšy jaho «biessaromnaj safistykaj».
Taksama Pchieńjan raskryŭ kanfidencyjnuju infarmacyju ab tym, što Sieuł na hetym tydni chacieŭ nakiravać u KNDR śpiecpasłańnikaŭ, kab razradzić napružanuju situacyju. U Sieule heta ličać «biesprecedentnym parušeńniem bazavych paniaćciaŭ ab etykiecie» i vinavaciać Poŭnač u skažeńni infarmacyi ab metach mierkavanaj pajezdki.
Pradstaŭnik Kamiteta načalnikaŭ štaboŭ krainy na bryfinhu zajaviŭ, što Respublika Kareja žorstka adreahuje na sproby KNDR destabilizavać situacyju na Karejskim paŭvostravie.
«Poŭnač zapłacić vysokuju canu, kali pačnie bajavyja dziejańni», — padkreśliŭ jon.
«Dziejańni Paŭnočnaj Karei pierakreślivajuć dva dziesiacihodździ sumiesnych namahańniaŭ, zroblenych dla palapšeńnia dvuchbakovych adnosin i zachavańnia miru na Karejskim paŭvostravie», — adznačyŭ pradstaŭnik KNŠ.
