Udzielniki papularnaha dueta Naviband Ksienija Žuk i Arciom Łukjanienka prezientavali ŭ Telegram pieśniu pad nazvaj «Inšymi». Jana pryśviečanaja apošnim padziejam u Biełarusi.
Fota ź Vikipiedyi
«My lubim našu krainu, śpiavajem na rodnaj movie i ščyra vierym u śviet, siłu i dabro našych ludziej, niezaležna ad ich pohladaŭ!», — napisali muzyki ŭ svaim instahramie.
Ksienija i Arciom hadujuć syna Macieja. Jamu krychu bolš za dva hady, ale baćkam usio składaniej adkazać na niekatoryja niazručnyja pytańni z boku chłopčyka.
«Jon viedaje praktyčna ŭvieś transpart u horadzie, jakoha jon koleru i kudy moža jechać. «Chutkaja» ratuje ludziej, ekskavatar kapaje jamu, kran buduje dom. Ale my nie viedajem, jak rastłumačyć dziciaci, što robić «vialikaja zialonaja mašyna», jakich u horadzie ŭsio bolš. A ciapier jašče i navina ab zatrymańni ludziej, jakija prosta stajali ŭ čarzie ŭ kramu».
Muzyki kažuć, što nie źbiralisia vykazvacca, bo pryvykli iści pa žyćci, robiačy svaju spravu bieź lišnich słovaŭ. Zamiest hetaha vypuścili ŭ Telegram-kanale pieśniu «Inšymi», u jakoj «kožnaje słova adlustroŭvaje toje, što ciapier adbyvajecca navokał».
«U nas nie ŭkładajecca ŭ hałavie žorstkaść i hvałt da zvyčajnych ludziej. Nam stanovicca strašna. Maŭčać užo niemahčyma! My pračniomsia inšymi!», — padsumavali ŭdzielniki hurta Naviband Ksienija Žuk i Arciom Łukjanienka.
