U sakaviku 2020 hoda pa rašeńni Alaksandra Łukašenki byłomu kiraŭniku Kyrhyzstana Kurmanbieku Bakijevu vydzielili ŭčastak u 45 sotak kala rezidencyi prezidenta na Minskim mory, vynikaje sa źviestak Adzinaha dziaržrehistra nieruchomaj majomaści Biełarusi. Čytajcie, što heta za ziamla i dla čaho jana pryznačana.
Kurmanbiek Bakijeŭ, jaho svajaki i siabry blizkaha koła biehli z Kyrhyzstana paśla krasavickaj revalucyi 2010 hoda. Tady ŭ centry Biškieka adbylisia sutyknieńni pamiž uładaj i apazicyjaj, padčas jakich bolš za 80 čałaviek byli zabityja, bolš za 300 paciarpieli. U vyniku hetych padziej u Kyrhyzstanie źmianiłasia ŭłada, a Bakijeŭ pasialiŭsia ŭ Biełarusi i atrymaŭ hramadzianstva. U 2015 hodzie ŭ mikrarajonie Ržaviec jon pabudavaŭ dom, jaki ŭ 2019-m padaryŭ dačce.
A 17 sakavika 2020 hoda Kurmanbieku Bakijevu ŭ pažyćciovaje spadčynnaje vałodańnie pakinuli ziamielny ŭčastak u 45 sotak na Minskim mory — niedalok ad rezidencyi prezidenta «Zasłaŭje-2». Metavaje pryznačeńnie — dla viadzieńnia asabistaj padsobnaj haspadarki. Voś jaho prykładnyja miežy:
Učastak pradastaŭleny na padstavie rašeńnia Minabłvykankama z hryfam «Dla słužbovaha karystańnia». Jano było pryniata ŭ adpaviednaści z rašeńniem prezidenta Biełarusi (rezalucyja ad śniežnia 2019 hoda).
Kurmanbieku Bakijevu ciapier 70 hadoŭ. U Kyrhyzstanie eks-prezident zavočna prysudžany da 30 hadoŭ pazbaŭleńnia voli. Ułady hetaj krainy damahajucca ad Biełarusi vydačy Bakijeva, jaho svajakoŭ i paplečnikaŭ na praciahu apošnich hadoŭ. Ale biełaruski bok nieadnarazova admaŭlaŭ u ich vydačy pad padstavaj pahrozy palityčnaha pieraśledu na radzimie.
