Fota z fejsbuka Natałki Charytaniuk
Piša ŭ svaim fejsbuku pierakładčyca i piśmieńnica Natałka Charytaniuk.
Vychad z partyi
Na tym tydni, zapaŭniajučy hrafu ŭ tablicy dla zboru podpisaŭ, ja ledź nie napisała — biespartyjnaja. I navat sama pasaromiełasia — bo zusim zabyła: u 18 hod ja ŭstupiła ŭ BNF. Z taho času taksama prajšło 18 hod. Apošnija hod dziesiać ja zusim nie čytała pra partyju i nie cikaviłasia jaje spravami. Pryčyny roznyja, ale nie heta važna. Mnie zdajecca, ja naahuł pražyła svaje 2010-ja nie azirajučysia pa bakach. Ale i heta nie važna. Važna, što 2020-ja ja pačynaju našmat bolš śviadoma i chaču narešcie jasnaści i konsekventnaści, jak toj kazaŭ (chm, hučyć padazrona, ale…).
Karaciej, ja zajšła na sajt Partyi BNF, pačytała pra kirunki jaje dziejnaści — i žachnułasia. Nam nie pa darozie.
Ja padzialaju ideju ŭmacavańnia niezaležnaści i nacyjanalnaj identyčnaści — heta Śviatoje. Ale mianie ŭziała strašnaja złość, kali ja pačała čytać pra supracoŭnictva z Aljansam kansiervataraŭ i refarmistaŭ (ja ich pahuhliła — kali prajścisia pa inšych siabrach hetaha aljansu, tam što ni partyja — to moj žach: Tramp, Džonsan, rasisty, praciŭniki imihracyi, adkrytyja hamafoby, tyja, chto zmahajecca z Katałonskimi nacyjanalistami, i tyja, chto ŭsio jašče pa-impersku zmahajecca ź irłandskimi respublikancami).
Dzie ja była ŭsie hetyja hady? spytajecie Vy.
Mnie soramna, i ja nie viedaju, što adkazać.
Dasłała ŭ partyju zajavu pra vychad z partyi:
Staršyni partyi BNF
Ryhoru Kastusiovu
ZAJAVA PRA VYCHAD Z PARTYI BNF
Ja, Natalla Babkova, vychodžu z partyi BNF, u jakuju ŭstupiła vasiamnaccać hadoŭ tamu (Bieraście, 2002). Z 2006 hodu ja nie prymała ŭdziełu ŭ žyćci partyi i, da svajho soramu, pierastała sačyć za raźvićciom palityki partyi i, hałoŭnaje, jaje mižnarodnych adnosin. Partyja asacyjavałasia ŭ mianie sa śvietłymi imionami Vasila Bykava, Uładzimiera Arłova, Lavona Barščeŭskaha, i ja ŭvieś čas biezumoŭna daviarała pryncypam, jakimi kiravałasia partyja, — antyimperskaha zmahańnia, nacyjanalnaha adradžeńnia, demakratyčnych kaštoŭnaściej.
Zusim vypadkova, niekalki dzion tamu zapaŭniajučy ankietu na vyłučeńnie ŭ kamisiju vybarčaha ŭčastka i paznačyŭšy svaju partyjnuju prynaležnaść, ja zajšła na staronku Partyi BNF i pabačyła nastupnaje:
«Kirunki mižnarodnaj dziejnaści:
I. Umacavańnie supracoŭnictva dy pavieličeńnie roli partyi BNF u Aljansie kanservataraŭ dy refarmistaŭ (ACRE), dy Mižnarodnym Demakratyčnym Źviazie (IDU).
II. Pašyreńnie dvuchbakovaha supracoŭnictva z partnerskimi dy siastrynskimi partyjami (polskaja PiS, brytanskaja Conservative Party, českaja ODS, łatvijskaja TB/LNNK, Respublikanskaja partyja ZŠA).»
Ja nie mahu dazvolić sabie navat farmalna znachodzicca ŭ partyi, jakaja «ŭmacoŭvaje supracoŭnictva» z partyjami, na čale jakich Borys Džonsan i Donałd Tramp, partyjami, jakija prapahandujuć rasizm i hamafobiju, imperskija pa svajoj sutnaści, vystupajuć za pryhniot nacyjanalistaŭ i patryjotaŭ u padparadkavanych ich bolšaści terytoryjach (heta ja pra hišpanski Voks (ich cisk na Katałoniju) i pra olsteraŭskich łajalistaŭ (ich sapraŭdnuju vajnu ź irłandskimi patryjotami)).
Mnie napraŭdu soramna, što ja tak doŭha nie cikaviłasia raźvićciom padziej u partyi i zastavałasia — chaj sabie i čysta farmalna — u partyi z takimi «partnerami».
Ja zaklikaju Partyju BNF skasavać supracoŭnictva z Aljansam kansiervataraŭ dy refarmistaŭ i šukać chaŭrusu z tymi, kaho hetyja kansiervatary i refarmisty pryhniatajuć — heta budzie bolš adpaviadać duchu BNF: antyimperskaha, nacyjanalistyčnaha i volnalubivaha.
Natalla Babkova (Charytaniuk)
Miensk, 24 červienia 2020
