Kiraŭnik homielskaj milicyi na zahad ministra Juryja Karajeva paprasiŭ prabačeńnia ŭ homielskich hłuchaniamych. Bratoŭ Bolbuchaŭ 19 červienia brutalna zatrymaŭ AMAP na «łancuhu salidarnaści», piša Radyjo Svaboda.

Jaŭhien Rusakievič, staršynia Homielskaha abłasnoha abjadnańnia Biełaruskaha tavarystva hłuchich, patłumačyŭ, što siońnia pradpryjemstva «VIPRA», dzie pracujuć braty Bolbuchi, naviedaŭ načalnik UUS Homielskaha abłvykankamu Alaksandar Vasiljeŭ. Jon prasiŭ u chłopcaŭ prabačeńnia za zatrymańnie supracoŭnikami AMAP u Homli.

«Skazaŭ, što milicyja nie ŭličyła, što braty — invalidy pa słychu, tatalna hłuchija, tamu adbyłosia nieparazumieńnie. Vasiljeŭ skazaŭ, što kab viedali, što jany tatalna hłuchija, to, kaniečnie, nie čapali b ich», — udakładniŭ Rusakievič.

Jon dadaŭ, što havorki pra mahčymy sud pa składzienych pratakołach nie było.

Andrej Bolbuch zaznačyŭ u razmovie z žurnalistami, što tydzień nadta pieražyvaŭ, paśla taho jak byŭ zatrymany i pravioŭ noč u IČU, a ciapier narešcie supakoiŭsia.

«Maja duša spakojnaja, usio narmalna. Ja zadavoleny, što tak zdaryłasia i ŭsio dobra skončyłasia», — skazaŭ Andrej. Jon dadaŭ, što ŭ izalatary jamu było «trochi strašna», i ličyć, što nie parušaŭ zakon.

Vital i Andrej skazali, što buduć hulać pa centry horadu, ale «aściarožna», a ŭ demanstracyjach udzielničać nia buduć.

«Ja atrymaŭ zadavalnieńnie, što pierada mnoj paprasili prabačeńnia», — skazaŭ Andrej. Jahony brat Vital dadaŭ, što «ź milicyjaj źviazvacca nia budziem, budziem bokam abychodzić».

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?