Pra heta havorycca ŭ zajavie na sajcie spring96.org.
«U suviazi z zatrymańniem błohiera i administratara telehram-kanała «Biełaruś hołovnoho mozha» Ihara Łosika pa art. 342 Kryminalnaha kodeksa Biełarusi (Arhanizacyja hrupavych dziejańniaŭ, jakija hruba parušajuć hramadski paradak) i abrańnia ŭ dačynieńni da jaho miery strymańnia ŭ vyhladzie ŭtrymańnia pad vartaj, pradstaŭniki pravaabrončaj supolnaści Biełarusi, jašče raz pacviardžajučy svaju pazicyju, vykładzienuju ŭ raniej pryniaty zajavach ad 1, 9, 11 červienia 2020 hoda, pryznali Ihara Łosika palityčnym źniavolenym.
Pravaabaroncy patrabujuć jahonaha nieadkładnaha vyzvaleńnia i spynieńnia raspačataha ŭ dačynieńni da jaho kryminalnaha pieraśledu.
Na siońniašni dzień pravaabaroncy pryznali palitźniavolenymi 20 čałaviek. 17 ź ich byli pryznanyja palityčnymi źniavolenymi padčas vybarčaj prezidenckaj kampanii. 29 traŭnia mižnarodnaja pravaabarončaja arhanizacyja Amnesty International pryznała viaźniami sumleńnia Siarhieja Cichanoŭskaha, Viktara Babaryku, ich paplečnikaŭ i błohieraŭ, ahułam — 17 čałaviek.
Ihar Łosik — błohier, administratar telehram-kanała «Biełaruś hołovnoho mozha», na jaki padpisana bolš za 172 tysiačy karystalnikaŭ. Ihar Łosik aktyŭna aśviatlaŭ padziei vakoł vybarčaj kampanii prezidenta Biełarusi. Taksama Ihar źjaŭlajecca pazaštatnym kansultantam vydańnia «Radyjo Svaboda».
U aŭtorak 25 červienia ŭ domie ŭ Baranavičach, dzie žyvie Ihar Łosik ź siamjoj, prajšoŭ vobšuk, paśla jakoha jaho zatrymali. Paśla ŭtrymańnia jaho u IČU ŭ Minsku (na Akreścina), zaraz jon znachodzicca ŭ SIZA №1 na vuł. Vaładarskaha ŭ Minsku.
