Fota Dźmitryja Bruško
Minčuki praciahvajuć paviedamlać pra prablemy z vadoj. Adny skardziacca, što ŭ kvatery viarnułasia śmiardziučaja vada, inšyja pišuć pra adklučanaje biez papiaredžańnia haračaje i chałodnaje vodazabieśpiačeńnie, piša Tut.by.
Neli Ivanaŭna žyvie na vulicy Prytyckaha, 42. Kaža: 27 i 28 červienia vada była narmalnaj, a 29-ha i 30-ha rezki niepryjemny pach viarnuŭsia.
— Čat doma burlić. Prablema va ŭsich padjezdach. Učora ŭviečary ludzi arhanizavali fłešmob i ŭ 21.00 masava spuskali vadu ŭ kvaterach — z hetaha ŭsio roŭna ničoha nie vyjšła. Muž učora ŭsio ž taki pryniaŭ duš i pa ŭsioj kvatery razyšoŭsia mocny pach — vielmi pachnie jodam. Mnohija žychary doma pakinuli zajaŭki na 115, ale da hetaha času situacyja nie palepšyłasia. Pakul vykarystoŭvajem dla pićcia vadu, jakuju nabrali ŭ papiarednija dni prazapas.
Śviatłana žyvie niepadalok, na vulicy Prytyckaha, 38.
— Vada śmiardzić da hetaha času, u tym liku siońnia ranicaj. Na padjezdach nivodnaj abjavy niama, u 115 prosta prymajuć zajaŭki, nijakaj reakcyi ni ad ŽESa, ni ad vodakanała. Dapamažycie razabracca, kali heta skončycca i čamu niama padvozu pitnoj vady? — aburajecca minčanka.
Uładzisłaŭ piša, što ŭ domie na vulicy Sierdziča, 66 vada taksama praciahvaje niepryjemna pachnuć.
— Zhodna z sajtam vodakanała, u nas u domie źmiašany vodazabor — z ačyščalnaj stancyi i z padziemnaj krynicy. Susiedzi praz paru damoŭ ad nas z čystaj vadoj užo try dni, a ŭ nas da hetaha času — kali ŭklučyć vadu na try chviliny, to ŭ vannu zajści niemahčyma.
U niadzielu mužčyna pakidaŭ zajaŭku na sajcie 115.bieł, ale prablema z vadoj u domie da hetaha času nie vyrašana.
«Niama ni haračaj, ni chałodnaj vady»
Druhaja katehoryja skarhaŭ na 30 červienia — u niekatorych damach źnikła vada. Vyraznych tłumačeńniaŭ z hetaj nahody ludzi nie atrymlivajuć, abjavy ab płanavych adklučeńniach na padjezdach nie visiać.
Taćciana — žycharka doma pa adrasie Kuncaŭščyna, 36.
— Užo try dni ŭ domie niama haračaj vady, choć płanavaje adklučeńnie tolki z 6 lipienia. I voś siońnia ŭ maim 9-m padjeździe niama vady naohuł, — aburanaja surazmoŭnica. — U niekatorych padjezdach chałodnaj vady nie było i ŭčora. Ja patelefanavała ŭ 115, mnie skazali, što avaryja. Pytajusia, što za avaryja takaja, ź jakoj try dni nie mohuć spravicca. Nichto nie viedaje, nichto nie ŭ kursie, z ŽES narmalna źviazacca nielha. Cysterny ź pitnoj vadoj pablizu da hetaha času niama.
Dziaŭčyna dadaje, što kali biez haračaj vady pražyć praściej, to chałodnaja patrebna zaŭsiody.
— Heta kolki treba nanosić vady dadomu z kramy? Bo jana patrebna nie tolki dla pitnych, ale i dla mnohich haspadarčych patreb.
Ranicaj ab adsutnaści vady ŭ damach taksama paviedamlali žychary damoŭ na vulicy Łabanka, 71, Šaranhoviča, 59-2, a taksama mikrarajona Malinaŭka-7.
Što kažuć u «Minskvodakanale»
U «Minskvodakanale» TUT.BY tłumačać, što zvaroty pa jakaści vady ŭžo nie masavyja. Pa ŭkazanych adrasach adklučeńnie vady pradpryjemstva nie pravodziła, a značyć, što za padrabiaznaściami varta telefanavać u ŽESy abo ŭ słužbu 115.
Sa skarhami na jakaść vady možna źviartacca nie tolki ŭ słužbu 115, ale i ŭ dyśpietčarskuju słužbu vodakanała pa telefonie 8 017 389-42-68. Adrasy damoŭ, dzie vada z krana praciahvaje niepryjemna pachnuć, možna pakidać taksama na staroncy pradpryjemstva na fejsbuku. Z pretenzijami pracujuć kropkava, śpiecyjalisty robiać adbor probaŭ pa kankretnych damach i vulicach.
Padvoz pitnoj vady pa niekatorych adrasach arhanizujuć i siońnia, za hetym treba sačyć na sajcie «Minskvodakanała». Prosta ciapier adna pitnaja cysterna znachodzicca na vulicy Bieruta.
