Žurnalist «Radyjo Svaboda» Anton Trafimovič učora viečaram vioŭ žyvy repartaž ad budynka Centralnaj vybarčaj kamisii. U rajonie Niamihi jaho i pazaštatnuju karespandentku ahienctva «BiełaPAN» Vijaletu Saŭčyc schapili amapaŭcy, vyzvalili žurnalistaŭ tolki paśla 20-j.
Padčas žorstkaha zatrymańnia Antona Trafimoviča mocna ŭdaryli ŭ tvar — pajšła kroŭ: «Mnie zakrucili ruki za śpinaj, zasunuli ŭ rot ruku, kab ja nie kryčaŭ. Pry zatrymańni mocna stuknuli pa nosie. U mikraaŭtobusie mianie pasadzili na padłohu na kaleni, nadzieli kajdanki za śpinaj, uvieś čas trymali hałavoj uniz. U mianie ciakła kroŭ, ale supracoŭniki milicyi na heta nie reahavali. Usia padłoha pada mnoj była ŭ kryvi, vopratka taksama zapeckanaja kroŭju».
Siońnia milicyja prakamientavała dziejańni svaich supracoŭnikaŭ:
«Hramadzianin akazaŭ niepadparadkavańnie zakonnym patrabavańniam supracoŭnikaŭ milicyi. U ramkach administracyjnaha pracesu jon byŭ zatrymany i dastaŭleny dla razboru ŭ Zavodskaje RUUS horada Minska. Cialesnyja paškodžańni, pra jakija paviedamlaje małady čałaviek, byli atrymanyja im padčas niepadparadkavańnia», — dali tłumačeńnie ŭ minskaj milicyi.
Na ŭdakładnialnaje pytańnie, u čym vyražałasia niepadparadkavańnie, pradstaŭnik MUS pakul nie adkazaŭ.
Pavodle zakanadaŭstva, zatrymańniu pavinna papiaredničać ździajśnieńnie pravaparušeńnia. U tam razie milicyja papiaredžvaje, što čałaviek pavinien spynić parušeńnie zakona, inačaj jaho dastaviać u RAUS dla raźbiralnictva. Kali ž jon praciahvaje parušać zakon — mohuć zatrymlivać. U situacyi z Trafimovičam pres-słužba MUS nie ŭ stanie patłumačyć, što kankretna parušaŭ žurnalist. Ich adkaz — «zaminaŭ pracy milicyi». Ale takoha składu pravaparušeńnia niama z zakanadaŭstvie.
Pa fakcie atrymańnia cialesnych paškodžańniaŭ budzie pravodzicca pravierka Śledčaha kamiteta.
