Kandydat u prezidenty Hanna Kanapackaja ŭ efiry BT-1 ahučyła asnoŭnyja pałažeńni svajoj pieradvybarčaj prahramy. Jana vystupaje za jeŭrapiejski šlach krainy, vychad z Sajuznaj dziaržavy, ADKB, za praviadzieńnie reform. Svoj vystup jana pradublavała na dźvie dziaržaŭnyja movy.
— Nam nieabchodna spynić imklivaje padzieńnie krainy ŭ sacyjalnuju i ekanamičnuju biezdań. Treba adnavić toje, što stračana za čverć stahodździa ciapierašniaj uładaj. My stracili bolš za miljon suhramadzian. My apynulisia ŭ žachlivaj demahrafičnaj jamie. My całkam stracili aŭtarytet u śviecie i navat siarod susiedziaŭ. My majem adstałuju pramysłovaść, nieefiektyŭnuju sielskuju haspadarku, napaŭzadušany pryvatny siektar, hihancki źniešni doŭh, vielizarny administracyjny i represiŭny aparaty, nasielnictva, što biadnieje, i aŭtarytarnaha lidara na čale dziaržavy, — zajaviła Kanapackaja.
Kandydat maje namier pravieści padatkovuju i sudovuju reformy, pierahledzieć biudžetnuju palityku, pravieści pryvatyzacyju niekatorych dziaržpradpryjemstvaŭ.
Taksama Kanapackaja vystupaje za niejtralitet Biełarusi. Jana prapanuje denansacyju damovy ab sajuznaj dziaržavie, vychad z ADKB, spynieńnie dahavoraŭ arendy rasijskich vajskovych abjektaŭ na terytoryi Biełarusi i vyvad rasijskich vajskoŭcaŭ.
U vypadku abrańnia Kanapackaja maje namier pravieści častkovuju reformu achovy zdaroŭja, a taksama piensijnuju reformu.
Kanapackaja adznačyła, što vystupaje za biaskroŭny demakratyčny pierachod ułady. Jana prapanavała abmiežavać prezidenctva adnym siamihadovym terminam, źmianieńnie sistemy dziaržaŭnaha kiravańnia ŭ formu parłamiencka-prezidenckaj respubliki.
