Kiraŭnička CVK Lidzija Jarmošyna, prymajučy rašeńnie pra abmiežavańnie kolkaści naziralnikaŭ na vybarčych učastkach, apielavała da źviestak Minzdaroŭja, pavodle jakich kala 41 tysiačy biełarusaŭ źjaŭlajucca kantaktami pieršaha ŭzroŭniu albo zaražanyja COVID-19 i znachodziacca na karancinie - «i heta nie ličačy tych, chto zaraz u balnicach».
Razam z tym, pavodle śviežaj statystyki Minzdaroŭja, u Biełarusi pa stanie na ranicu 22 lipienia za ŭvieś čas zafiksavany 66 521 vypadak karanavirusa (+173 za sutki, učora — 135), pryčym vyzdaravieli i vypisanyja za ŭvieś 59 061 pacyjent. Takim čynam na dadzieny momant chvarejuć 6 947 čałaviek.
Aproč taho, siońnia ministr zdaroŭja Uładzimir Karanik zajaviŭ, što źnižeńnie karanavirusa nazirajecca va ŭsich rehijonach
«Situacyja ŭsiudy kiravanaja. My nie sasłablajem kantrol. Va ŭsich rehijonach my bačym nie tolki stabilnuju situacyju, ale i stabilnaje źnižeńnie kolkaści chvorych. U rehijonach, jakija ŭvachodzili paźniej u epidpraces, ličby krychu vyšejšyja, čym u inšych. Ale ŭstojlivaje źnižeńnie kolkaści pacyjentaŭ ź pnieŭmanijaj, tak i karanavirusnaj infiekcyi my nazirajem paŭsiudna ŭ krainie ŭžo na praciahu niekalkich tydniaŭ», — skazaŭ siońnia Uładzimir Karanik.
Paźniej Minzdaroŭja raspaŭsiudziła śpiecyjalny reliz.
«U suviazi sa šmatlikimi zapytami ŚMI infarmujem, što ahučanyja CVK źviestki tyčacca asob, jakija na siońniašni dzień znachodziacca pad usimi vidami miedycynskaha nazirańnia. U hetuju hrupu ŭvachodziać infikavanyja COVID-19 pacyjenty (u tym liku tyja, chto znachodzicca ŭ stacyjanarach), kantakty pieršaha ŭzroŭniu (jakija nie chvarejuć, ale znachodziacca na chatnim karancinie, bo mohuć być pieranosčykami zachvorvańnia), kantakty druhoha ŭzroŭniu i jašče adna hrupa — hramadzianie, jakija viarnulisia z krain ź niespryjalnaj epidabstanoŭkaj».
«Ministerstva achovy zdaroŭja čarhovy raz zaklikaje hramadzian ustrymacca ad vyjezdaŭ za miežy Biełarusi ŭ rehijony ź niespryjalnym stanoviščam pa karanavirusie. Z pačatkam letniaha azdaraŭlenčaha siezonu pavialičyłasia kolkaść asob, jakim paśla viartańnia nieabchodna znachodzicca pad miedycynskim nahladam u suviazi z tym, što jany naviedali krainy, u jakich usio jašče aktyŭna rehistrujucca vypadki COVID-19», — havorycca ŭ relizie.
