Fota SK
21 lipienia ŭ Halšanach (Ašmianski rajon) adbyłasia trahiedyja: piaskom zasypała dvuch chłopčykaŭ 11 i 12 hadoŭ, jakija hulali ŭ nievialikim karjery na ŭskrainie pasiołka. Zaraz Śledčy kamitet pravodzić pravierku, piša Tut.by.
Pa słovach miascovych žycharoŭ, chłopčyki — stryječnyja braty.
«Dzieci nie miascovyja, nie halšanskija. Pryjechali na leta da babuli. Dzieci jak dzieci. Biehali, hulali. Adzin z Ašmianaŭ, druhi — z Maładziečna», — raspaviadajuć miascovyja žychary.
Miesca, dzie zdaryłasia trahiedyja, znachodzicca za 200 mietraŭ ad zavułka Lasnoha, što na ŭskrainie Halšan. Tut i znachodzicca toj karjer, dzie zasypała chłopčykaŭ. Praŭda, u miascovym sielsaviecie kažuć, što heta chutčej prosta jama, dzie miascovyja žychary brali piasok.
— Dy i toje, tam piasok-płavuniec i nie padychodzić dla budoŭli, naprykład. Učora da samaj nočy na miescy pracavali śpiecyjalisty roznych viedamstvaŭ: i prakuratura, i Śledčy kamitet, — kažuć u sielsaviecie.
Pavodle infarmacyi MNS, jama, dzie adbyłasia trahiedyja, zusim nievialikaja. Jaje pamier 5 na 6 mietraŭ, a hłybinia — 1,5 mietra.
Pavodle źviestak śledstva, uviečary 21 lipienia dvoje chłopčykaŭ 11 i 12 hadoŭ hulali ŭnutry katłavana, jaki ŭtvaryŭsia paśla zaboru piasku miascovymi žycharami. Kali dzieci znachodzilisia ŭ jamie, abrynuŭsia hrunt — chłopčyki byli zasypanyja piaskom. Na miesca prybyli ratavalniki, jany dastali dziaciej, ale vyratavać nie ŭdałosia.
Miascovyja žychary raspaviadajuć, što chłopčykaŭ vyjaviŭ adzin ź viaskoŭcaŭ, jaki prachodziŭ mima. Dakładniej, jon zaŭvažyŭ dziciačy abutak i abvał piasku, a potym vyklikaŭ ratavalnikaŭ.
— Dzieci tam, zdajecca, la bakavoj ścienki jamy kapali niešta, niby vyjemku. Tady piasok i absypaŭsia. Ich znajšli, napeŭna, nie adrazu. Doma ich da taho času nie było hadziny dźvie, — raspaviadajuć miascovyja žychary.
