Fota: belaoki.by
Pra heta napisaŭ u fejsbuku jaje aŭtar, mastak Siarhiej Biełavoki, siabra Biełaruskaha sajuza mastakoŭ i łaŭreat Nacyjanalnaj premii ŭ halinie vyjaŭlenčaha mastactva—2017.
«Siońnia ja vymušany vystupać u nieŭłaścivaj dla siabie roli i pisać hety tekst, tamu što mianie, jak mastaka, pazbavili prava svabodnaha vykazvańnia, — adznačaje Biełavoki.
22 lipienia ŭ Pałacy mastactvaŭ pačynajecca vystava «Tryjenale sučasnaha mastactva» pa vynikach respublikanskaha konkursu «Nacyjanalnaja premija ŭ halinie vyjaŭlenčaha mastactva» u 2019-2020 hh. Pa vynikach hałasavańnia siabraŭ adboračnaj kamisii, maja mastackaja praca «Vitraž-AT» była adabranaja ŭ šortlist konkursu ŭ naminacyi «Aktualnaje mastactva» dla pradstaŭleńnia na vystavie.
Adnak za niekalki dzion da adkryćcia dyrekcyja konkursu paprasiła mianie dobraachvotna źniać pracu, «kab paźbiehnuć mahčymych pravakacyj!», na što ja adkazaŭ kateharyčnaj admovaj.
U vyniku arhanizatary vystavy źniali maju pracu z konkursu z farmuloŭkaj: «Vaša praca na tryjenale sučasnaha mastactva była pradstaŭlenaja nie ŭ poŭnym abjomie (u častcy adsutnaści kamianioŭ jak elemienta tvora)».
Hetym listom ja chaču vykazać svajo abureńnie i niazhodu ź niepravamiernymi dziejańniami dyrekcyi Respublikanskaha konkursu «Nacyjanalnaja premija ŭ halinie vyjaŭlenčaha mastactva», jakaja viartaje epochu cenzury ŭ biełaruskaje vyjaŭlenčaje mastactva, i hruba parušaje artykuł 51 Kanstytucyi, jaki harantuje svabodu mastackaj, navukovaj, techničnaj tvorčaści.
I jašče ja chaču paprasić usich nieabyjakavych tvorčych ludziej, ludziej mastactva, nie zastavacca ŭbaku, nie maŭčać, i vykazacca pa fakcie parušeńnia prava na svabodu tvorčaści.
Bo, pa vialikim rachunku, havorka idzie nie ab adnoj pracy kankretnaha mastaka, havorka - ab stanoviščy biełaruskaha mastactva, ab uščamleńni našaha prava na svabodu tvorčaha vykazvańnia», — piša mastak.
Jaho instalacyja «Vitraž-AT» ujaŭlaje saboj «šerah lustranych abjektaŭ, jakija ŭvasablajuć saboj dakładnuju kopiju supraćudarnaha ščyta Vitraž-AT, vykananaha ŭ maštabie 1:1.
Jak adznačajecca ŭ apisańni tvora, «Vitraž-AT - ščyt supraćudarny, pryznačany dla vykarystańnia śpiecpadraździaleńniami roznych pravaachoŭnych orhanaŭ. Vykarystoŭvajecca dla abarony ad udaraŭ kamianiami, pałkami, kuvałdaj, mołatam i inšaj «zbrojaj» praletaryjatu.
Hladač, ubačyŭšy ŭ šerahu lustranych ščytoŭ svajo adlustravańnie, moža ujavić siabie jak udzielnika pratestnaha ruchu ŭ procipastaŭleńni łancuhu bajcoŭ śpiecpadraździaleńniaŭ.
Na adkryćci prajekta, prachodziŭ pierfomans, padčas jakoha hladač stanaviŭsia tvorcam, transfarmujučy/raźbivajučy abjekty ź pieršapačatkovaha stanu - «supraćudarnaha ščyta Vitraž-AT» u «Vitraž» - jak tvor manumientalna-dekaratyŭnaha mastactva (z dapamohaj udaru kamiania pa lusterku).
Vitraž - vid manumientalnaha mastactva, tvor vyjaŭlenčaha dekaratyŭnaha mastactva sa škła i/abo lusterka, nabranaha ź nievialikich kavałačkaŭ materyjału.
Adnak, bačyć svajo adlustravańnie ŭ raźbitym lusterku abo raźbivać lusterka, — pa tradycyjnych vieravańniach usich narodaŭ śvietu, - praročać čałavieku hora i biedstvy».
