«Pahražali kryminalnaj spravaj ab źniavazie prezydenta i abiacali nie źmiaščać maje vybačeńni ŭ internet, ale padmanuli», raskazaŭ Jahor Radyjo Svaboda.

18-hadovy Jahor Kiedzič, jaki žyvie i pracuje ŭ Miensku, a sam z Červieńskaha rajonu, — toj samy chłopiec, jaki dva tydni tamu vybačaŭsia na videa za toje, što 1 lipienia raskidaŭ u vioscy ŭlotki «3%» i napisaŭ na prypynku słovy «Stop tarakan». Jahora i jahonaha baćku pakarali štrafami ahułam na 2295 rubloŭ, ale takich hrošaj u siamji niama, a biaz spłaty štrafaŭ, jak skazali milicyjanty, telefon dy inšuju techniku jamu nie addaduć.

Biez telefona ž, kaža Jahor, jamu nia ŭdasca padzarabić na spłatu štrafu — asnoŭny zarobak u jaho nievialiki. Častku srodkaŭ jamu dapamahli sabrać na #BY_Help. «Pałova ŭžo jość», — skazaŭ Jahor.

«Kazali, što padklučycca KDB»

Jahor patłumačyŭ, jak atrymałasia, što jon pahadziŭsia zapisać svaje vybačeńni na videa, i jak da jahonaha ŭčynku pastavilisia svajaki, siabry i kalehi na pracy.

«Mianie aburaje palityka ŭład, ja za pieramieny, tamu i vyrašyŭ pratestavać», — kaža Jahor.

Napiaredadni zatrymańnia jon pryjechaŭ na vychodnyja da baćkoŭ u rodnuju viosku Lady, što ŭ Červieńskim rajonie. Ź Miensku pryvioz balončyk z čyrvonaj farbaj, a na pryntary razdrukavaŭ ulotki pra 3%.

Ulotki Jahor padkidvaŭ praz płot adnaviaskoŭcam, a farbaj raśpisaŭ prypynak nadpisami «Stop tarakan» i «Saša 3%». Na darožnym znaku abmiežavańnia chutkaści ŭ 30 kilametraŭ jon zamiest 0 namalavaŭ%.

«Znak potym prybrali, a ciapier pastavili novy, ale ŭžo 40. Na ŭsiaki vypadak, kab bolš nie padmalavali», — śmiajecca Jahor.

Nazaŭtra ranicaj jaho z baćkam zabrała milicyja.

«Baćku tamu, što razam chadzili pa vioscy», — kaža Jahor. Dadaje, što ŭ milicyju pra ich paviedamiŭ adnaviaskoviec.

«U nas zrabili pieratrus, zabrali moj noŭtbuk, pryntar i mabilnik. Usio šukali balončyk, ale nie znajšli. Zavieźli ŭ Červieński rajadździeł milicyi, trymali tam da viečara. Składali pratakoły, mianie apracoŭvali, pałochali, što KDB padklučycca. Voś tady ja i sastupiŭ: pahadziŭsia na hetaje vybačeńnie. Ale ciapier byŭ by razumniejšy, nie paddaŭsia b», — kaža Jahor.

Pavodle chłopca, ź im razmaŭlaŭ vysokapastaŭleny aficer milicyi — proźvišča i zvańnia jon nie zapomniŭ. Hety milicyjant, jak śćviardžaje Jahor, uvieś čas ź niekim pierapisvaŭsia praz telefon.

Pavodle Jahora, milicyjant pahražaŭ, što zaviadzie kryminalnyja spravy za abrazu prezydenta i na jaho samoha, i na baćku.

«A kab hetaha nie było, prapanavaŭ zapisać na videa vybačeńnie. Pryčym skazaŭ, što źmiaščać jaho nia buduć, ale zapis im patrebny dla padstrachoŭki: kab bolš takoha nie rabiŭ. Dali prahledzieć padobnaje videa chłopca z Maładečna, skazali, što dakładna mušu havaryć, voś ja i pahadziŭsia. Navat nie skažu, što adčuvaŭ. Tolki pamiataju, što mocna spužaŭsia», — zhadvaje Jahor Kiedzič.

Aštrafavali na 2295 rubloŭ pry zarobku 500

6 lipienia Jahoru Kiedziču pryznačyli pakarańnie. Spačatku kamisija Červieńskaha rajvykankama aštrafavała jaho za nadpisy na 675 rubloŭ, a baćku — na 540. U toj ža dzień sud aštrafavaŭ jaho na 1080 rubloŭ. Na sudzie Jahor pryznaŭ vinu, pahadziŭsia vypłacić štraf — i dumaŭ, što historyja na hetym skončycca.

Ale na nastupny dzień milicyja abnarodavała jahonaje videa z vybačeńniami.

«Ź siabroŭ mianie nichto nie asudžaŭ. Naadvarot, usie zrazumieli, što jano zapisana pad ciskam, i aburalisia, što milicyjanty nia vykanali abiacańnia nie vystaŭlać videa. U siamji adbyŭsia padzieł: maci suprać, jana za mianie niepakoicca, a baćka adnaznačna padtrymlivaje. Na pracy kalehi taksama padtrymali. Tam bolšaść za Cichanoŭskaha i jahonuju žonku, za pieramieny. Usim hety vo jak nadakučyŭ!» — apavioŭ Jahor Kiedzič.

Jahor kaža, što taksama rasčaravaŭsia ŭ dziejnaj uładzie. Jon pryhadaŭ, jak da jahonaha dzieda-invalida, kali toj złamaŭ nahu, admoviłasia jechać chutkaja dapamoha z rajona.

«Viaskovamu čałavieku žyć vielmi ciažka i kryŭdna. Na maich vačach vioski puściejuć, hinuć, a ŭłady kažuć, što žyćcio stanovicca lepšym. Vielmi nadakučyła heta čuć», — aburajecca Jahor.

Dla Jahora Kiedziča vybary 9 žniŭnia buduć pieršymi ŭ žyćci. Za kaho źbirajecca hałasavać?

Małady čałaviek pryznajecca, što ŭžo vyznačyŭsia, choć daviałosia pachvalavacca za kandydata.

«Čamu žančyna nia moža być prezydentam? Moža być, i nia horšym za niekatorych».

Adkazny supracoŭnik Červieńskaha rajadździeła milicyi ŭ razmovie z karespandentam Svabody skazaŭ, što heta była nia ich inicyjatyva raźmiaścić videa z vybačeńniami, i paćvierdziŭ historyju z zatrymańniem i vybačeńniami Jahora Kiedziča ŭ internecie.

«Rašeńnie prymałasia nia ŭ nas», — skazaŭ milicyjant.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?