Sustreča z kandydatam u przidenty Śviatłanaj Cichanoŭskaj u Rečycy prachodzić kala kaplicy ŭ honar Jeŭfrasińni Połackaj.
U susiednim amfiteatry hučna hraje muzyka: tam pravodzicca paci dla 20 dziaciej.
Na sustreču ź Cichanoŭskaj u Rečycy sabrałasia kala 1000 čałaviek. Pakul heta samy małaliki pikiet za ŭsio turne, jakoje pačałosia ź Viciebskaj vobłaści, praciahnułasia ŭ Mahiloŭskaj. Siońnia Cichanoŭskaja abjazdžaje Homielščynu.
U čakańni pradstaŭnikoŭ štaba i Śviatłany Cichanoŭskaj na scenie hraje miascovy hurt «Chjumana Kałajders». Pierad scenaj sabrałasia niekalki sotniaŭ čałaviek. Hurt śpiavaje «Pieramien» Viktara Coja. Ludzi achvotna padpiavajuć «Pieramien».
Viadučy sa sceny papiaredžvaje, što pravakataraŭ lepš abychodzić bokam.
Tut taksama ludzi roznyja ŭzrostu: i moładź, i siaredniaha vieku i piensijaniery.
Pačatak mitynha pakul adkładvajecca. Skazali, što jašče 10 chvilin: «Zatrymlivajucca nie pa svajoj vinie», — kažuć arhanizatary.
16:03
Urešcie jany źjavilisia na scenie, choć i z hadzinaj spaźnieńnia. Usie ich vitajuć avacyjaj, «Žyvie Biełaruś!» i «Vierym, možam, pieramožam!»
Cichanoŭskaja vybačyłasia za spaźnieńnie.
«Nas spyniajuć, ale my ruchajemsia napierad», «Nam čyniać pieraškody, a my ruchajemsia napierad, nas ništo nie moža spynić», — kaža jana.
Śviatłana pierakazvaje historyju Siarhieja Cichanoŭskaha i čamu vyrašyła sama bałatavacca. Ludzi pieraryvajuć jaje, hukajučy «Małajčyna!».
«Byŭ momant, kali ja straciła nadzieju i ledź nie zdałasia. Ale kali ja ŭbačyła, jak vy stali ŭ čarzie, kab pakinuć podpis za nikomu nie viadomuju Cichanoŭskuju, kali vy samaarhanizavalisia ŭ momant, kali ja ŭsia pahruziłasia ŭ [prablemy] muža — ja zrazumieła, što nielha zdavacca… Vy — našy hieroi, vy — naš štab».
Z natoŭpa joj pakazali na čałavieka, jakoha zaŭvažyli pad dacham bližejšaj šmatpaviarchoŭki: hladzicie, maŭlaŭ, snajpier.
- Snajpier?.. Nu, nie viedaju — kaža Śviatłana. — Napeŭna, prosta čałaviek zachacieŭ pahladzieć, jamu nie chapiła miesca … navošta nam snajpier, my ž mirnaja kraina.
16:15
U Rečycy pačaŭsia mocny doždž. «Siabry, dzialiciesia parasonami», — zaklikaje Śviatłana
«Niahledziačy na pieraškody, my abjadnalisia dziela sumlennych spraviadlivych vybaraŭ. Ja kali stanu prezidentam, pryznaču sumlennyja vybary, kab pryniali ŭdzieł hodnyja kandydaty».
Jana zaklikaje ŭsich pryjści na vybarčyja ŭčastki mienavita 9 žniŭnia.
16:35
Maryja Kaleśnikava pačała pramovu pa-biełarusku. Jana paŭtaryła zbolšaha tezisy ź Viciebska i Žłobina. Jana zaklikaje nie bajacca i zrabić pravilny vybar.
16:55
Vieranika Capkała taksama paŭtaryła raniejšyja tezisy, zaklikała nasić biełyja stužki na ruce.
Rečyca vielmi ciopła praviała Cichanoŭskuju, Kaleśnikavu i Capkała. Jany zaraz trymajuć kurs na Homiel.
***
Zrešty, dla Rečycy i takaja kolkaść udzielnikaŭ palityčnaj padziei — rekordnaja.
Rečyca — heta 65-tysiačny horad naftavikoŭ, centr naftazdabyčy ŭ Biełarusi.
Heta ŭžo 10 horad, jaki naviedajuć Śviatłana Cichanoŭskaja, Maryja Kaleśnikava i Vieranika Capkała. Spačatku byŭ Barysaŭ, taksama mitynh u parku Družby narodaŭ u Minsku, Barysaŭ, Hłybokaje, Navapołack, Viciebsk, Orša, Mahiloŭ, Babrujsk. Siońnia a 12-j hadziny jany zavitali ŭ Žłobin.
A 20-j praduhledžana sustreča ŭ Homieli.