26 lipienia ŭ Breście praciŭniki akumulatarnaha zavoda nie pajšli na sustreču z kiraŭnictvam pradpryjemstva, jakaja prachodziła ŭ aktavaj zale harvykankama. Zamiest hetaha aktyvisty prajšli kałonaj pa centralnych vulicach horada, piša Tut.by
A 12.00 aktyvisty vyjšli na płošču Lenina, dzie dva z pałovaj hady kormiać hałuboŭ na znak pratestu z budaŭnictvam akumulatarnaha zavoda. Supracoŭniki milicyi paprasili ich pakinuć płošču i prajści ŭ aktavuju zału harvykankama, dzie a 12.30 była pryznačanaja sustreča z dyrektaram pradpryjemstva Dźmitryjem Butavym i hałoŭnym inžynieram Siarhiejem Dubnavickim.
U pryznačany čas aktyvisty padyšli da aktavaj zały, ale na sustreču vyrašyli nie iści. Kala 40 praciŭnikaŭ zavoda ž prajšli kałonaj praz płošču Lenina i dalej pa vulicach Puškinskaj i Savieckaj. Kančatkovaj kropkaj maršrutu stała placoŭka kala kinateatra «Biełaruś». Paśla hetaha aktyvisty razyšlisia. Supracoŭniki milicyi im nie pieraškadžali. Pavodle papiaredniaj infarmacyi, abyšłosia biez zatrymańniaŭ.
- Pazicyja aktyvistaŭ ćviordaja: my suprać akumulatarnaha zavoda. Tamu abmiarkoŭvać z kiraŭnictvam pradpryjemstva nam niama čaho, - rastłumačyŭ pravaabaronca Raman Kiślak, jaki prysutničaŭ na sustrečy. - Ja zastaŭsia ŭ zale, kab zadać pytańni pa zabieśpiačeńni zachoŭvańnia niebiaśpiečnych materyjałaŭ na zavodzie.
Niahledziačy na demarš praciŭnikaŭ zavoda, sustreča z kiraŭnictvam pradpryjemstva ŭsio ž adbyłasia. Pa słovach Ramana Kiślaka, u zale prysutničali hledačy, jakija nie źjaŭlajucca aktyvistami Ruchu suprać akumulatarnaha zavoda.
- Paśla sustrečy častka ź ich prajšła da pryparkavanaha kala harvykankama mikraaŭtobusa z nadpisam «Pinsk» i na im źjechała, — kaža pravaabaronca.