Remarka: dla apytańnia byli abranyja absalutna randomnyja maładziony z roznych kutkoŭ Biełarusi. Z amal sotni čałaviek, da jakich ja źviarnułasia z prośbaj pahutaryć pa temie vybaraŭ, pahadzilisia tolki siem. Pryčyny admoŭ byli padobnyja: «nie chaču siadzieć 15 sutak praz svajo mierkavańnie», «tolki kali ananimna», «bajusia nastupstvaŭ» i hetak dalej.
Liza Navickaja, 18 hod (Minsk)
— U dadzieny momant ja vučusia ŭ BNTU na pryborabudaŭničym fakultecie. Pakul ciahnucca vakacyi, vyrašyła taksama padpracavać u sietcy chutkaha charčavańnia. Spadziajusia, zmahu sumiaščać pracu z parami i padčas navučalnaha hoda.
Ja nikoli asabliva nie cikaviłasia palitykaj: dla mianie na pieršym miescy było navučańnie. I jak studentku mianie ŭsio zadavalniała: ja biudžetnica, mnie vypłačvajuć stypiendyju — i vydatna.
Ale ciapier abyści palityčnuju paviestku ŭvahaj niemahčyma: siońnia vybary, zdajecca, abmiarkoŭvajuć usie navokał. U sacsietkach proćma infarmacyi, znajomyja kažuć tolki pra heta. Plus ja žyvu na praśpiekcie Niezaležnaści, i kali Viktara Babaryku nie zarehistravali kandydatam u prezidenty, ja na svaje vočy bačyła tuju vielizarnuju kolkaść kiroŭcaŭ, što sihnalili, padtrymlivajučy akcyju salidarnaści, i aŭtazaki. Mnohija maje siabry byli na pieršym dazvolenym mitynhu Śviatłany Cichanoŭskaj u Minsku, raskazvali pra jaho.
Karaciej, ciapier składana być nie ŭ temie. Ja taksama ŭklučyłasia ŭ infarmacyjnyja pracesy. Naprykład, zaŭsiody pierasyłaju 70-hadovaj babuli ŭsie važnyja naviny ŭ vajbier. Jana ŭ mianie toj čałaviek, jaki ŭvieś čas hałasavaŭ za Alaksandra Łukašenku, jašče i daterminova, ale jana tak prasiaknułasia zvarotam Maryi Kaleśnikavaj, što skazała: «U heta raz pajdu na ŭčastak tolki 9 žniŭnia».
Sama ja taksama abaviazkova prahałasuju 9-ha: mnie nieabyjakava toje, u jakoj krainie budu žyć ja i maje rodnyja. Praŭda, za kaho prahałasuju, pakul kazać nie chaču. Ale heta dakładna budzie nie dziejny kiraŭnik dziaržavy.
Ivan Luščanok, 18 hod (Pinsk)
— Kali kazać pra siabie, to ja student Homielskaha dziaržaŭnaha mieduniviersiteta. I skažu ščyra: raniej mała cikaviŭsia palitykaj. U hetym ža hodzie saču za ŭsioj pieradvybarčaj kampanijaj. Na hetych vybarach narešcie źjavilisia apazicyjnyja kandydaty, jakija skłali kankurencyju dziejnamu prezidentu, uvieś praces staŭ cikavy.
Na vybary pajdu 9 žniŭnia: heta moj hramadzianski abaviazak i sproba niešta źmianić. I prahałasuju za Śviatłanu Cichanoŭskuju: mnie blizkija jaje pohlady i prahrama.
Kali moj kandydat nie vyjhraje, viadoma, rasstrojusia, ale nie ździŭlusia: usio ž my žyviom u Biełarusi.
Aryna Maciušonak, 18 hod (Kličaŭ)
— Ja žyvu ŭ Minsku, źjaŭlajusia studentkaj BDEU. Nikoli hłyboka nie ŭnikała ŭ palityku, ale zusim joju cikavicca ŭ ciapierašniaj situacyi, liču, niemahčyma. Choć u majoj siamji asabliva nikoli nie varušyli hetuju temu: napeŭna, tamu što nie va ŭsich jość dostup da realnaj infarmacyi, bolšaść hladzić tolki televizar, a tam usio nadta pryhoža. Dobra, što sama ja maju dostup da niezaležnych ŚMI, jakija abjektyŭna apisvajuć padziei ŭ krainie, raspaviadajuć pra ŭsie składanaści, što paŭstajuć na šlachu kandydataŭ i ludziej, jakija vykazali śmiełaje mierkavańnie.
Ja abaviazkova pajdu i prahałasuju 9 žniŭnia. Liču, što pavinna paŭdzielničać u losie krainy. Luby moža dumać, što ad jaho hołasu ničoha nie zaležyć, ale ž heta nie tak. Ja ščyra chaču vieryć, što heta nie tak.
Pakul jašče nie ŭpeŭnienaja, addam hołas kamuści kankretnamu ci prahałasuju suprać usich. Ale moj vybar dakładna spynicca nie na siońniašnim prezidencie, bo chočacca źmienaŭ. Krainie patrebnyja śviežyja mazhi i idei dla taho, kab jana była krainaj dla žyćcia nie tolki ŭ rekłamie pa televizary. I dumaju, mnohija padzialajuć maju pazicyju.
Viktoryja Smalak, 19 hod (Minsk)
— Ja studentka histaryčnaha fakulteta BDU. Palitykaj cikaviłasia zaŭsiody, ale ŭ hetym hodzie saču za padziejami ŭ krainie asabliva pilna. Dla paraŭnańnia — parłamienckija vybary prajšli amal mima mianie: ja nie viedała pra ich ničoha, akramia taho, što było napisana va ŭlotcy na ŭvachodzie ŭ internat. Napeŭna, tak adbyłosia praz maju ŭpeŭnienaść: parłamient u nas ničoha nie vyrašaje. Mienavita tamu tyja vybary i nie padalisia mnie važnymi.
Čaściej ŭsie naviny ja atrymlivaju z tielehram-kanałaŭ «Niechta», «Otčiśleno» i inšych.
U siamji palityčnych tem starajusia paźbiahać, kab nie było kanfliktaŭ i łajanki: ja, skažam tak, prytrymlivajusia apazicyjnych pohladaŭ, a babula z maci pazicyi «jak by čaho nie vyjšła».
Hałasavać pajdu, bo ŭ hetym hodzie, mahčyma, niešta atrymajecca źmianić. Ale navat kali nie atrymajecca, ja budu viedać, što sa svajho boku zrabiła ŭsio, što mahła. Mienavita tamu ja akredytavałasia jak naziralnica. Nie puściać na ŭčastak — budu ličyć kolkaść tych, chto pryjšoŭ na jaho ź biełymi stužkami zvonku.
Ahułam pieramoha na vybarach-2020 luboha alternatyŭnaha kandydata — heta hučyć kazačna. Pieramoža toj, chto i pavinien pieramahčy. Praŭda, usio ž chočacca vieryć, što ŭ biełarusaŭ narešcie budzie novy prezident.
Juryj Varabjoŭ, 18 hod (Kaściukovičy)
Ja rodam z Kaściukovickaha rajona, vučusia na inžyniera-enierhietyka ŭ BNTU. Palitykaj cikaviŭsia zaŭsiody, bo lublu historyju, a jany ŭzajemaźviazanyja. Łahična, što ź pieršych dzion pieradvybarčaj kampanii ja ŭ kursie ŭsich kandydataŭ i ich abiacańniaŭ, u kursie akcyj, jakija prachodzili ŭ Minsku.
Biezumoŭna, ja pajdu hałasavać: usio ž heta novy dla mianie cikavy dośvied. Pakul nie viedaju, praŭda, u jaki dzień. I, zdajecca, heta niavažna i ničoha nie vyrašyć: mnie zdajecca, daŭno zrazumieła, chto pieramoža na hetych vybarach. Prosta pasłuchajcie, što pra heta kaža dziejny prezident.
Karyna Hrybko, 21 hod (Červień)
— U dadzieny momant ja pracuju miedsiastroj i płanuju pastupać u BDPU na praktyčnuju psichałohiju. Palitykaj pačała cikavicca, jak tolki dasiahnuła paŭnalećcia. Za plačyma ŭ mianie — hałasavańnie ŭ parłamienckich vybarach minułaha hoda, ale ja navat nie pamiataju proźvišča čałavieka, za jakoha tady padpisałasia.
Ja aktyŭna čytaju naviny, manitoru ŭsie padziei datyčna kandydataŭ ad samaha startu zboru podpisaŭ. 9-ha abaviazkova pajdu na vybary, bo chaču, kab ułada źmianiłasia. Pieršapačatkova płanavała hałasavać za Viktara Babaryku, ale jaho nie zarehistravali. Tak što, chutčej za ŭsio, spyniusia na Śviatłanie Cichanoŭskaj.
Kali znoŭ pieramoža Łukašenka, rasstrojusia: ja viedaju, što bolšaść biełarusaŭ taksama choča novaha prezidenta, u siońniašniaha niama 60—70% padtrymki, pra jakija jon kaža. I kali jon vyjhraje — značyć, hałasy znoŭ nakrucili. U płanach pajści na mitynh pry takim raskładzie.
Darja Kasiuk, 18 hod (Pinsk)
— Ja zajmajusia raspracoŭkaj sajtaŭ. Nie ŭjaŭlaju, jak možna zastavacca apalityčnym u siońniašnich abstavinach. Ja stała čytaju ŭsie naviny nakont vybaraŭ, časta vykazvajusia pa temie ŭ instahramie.
U našaj siamji palityčnyja temy abmiarkoŭvać nie pryniata, i kali ja sprabuju zahavaryć pra heta, naprykład, z babulaj — časta heta pryvodzić da kanfliktaŭ.
Ja abaviazkova pajdu na vybary, bo maru pra pieramieny. Chaču, kab vyjhraŭ choć chtości, hałoŭnaje nie 3%. Kali ščyra, navat chvalujusia: usio ž heta buduć maje pieršyja vybary.
Na toje, što ŭ nas budzie novy prezident, ja bolš spadziajusia, čym vieru ŭ heta. Ale biełarusy zrabilisia hučniejšymi, pačali narešcie zastupacca za svaich. Dumaju, usio heta dakładna nie projdzie biasśledna.
Fota na hałoŭnaj staroncy: Nadzieja Bužan.
