Alaksandr Łukašenka zasłuchaŭ dakład staršyni KDB Valeryja Vakulčyka i staršyni Śledčaha kamiteta Ivana Naskieviča pra situacyju z zatrymanymi raniej rasijanami z pryvatnaj vajennaj kampanii, piša BiełTA.
«Mnohija fakty (vy mnie piśmova dałažyli) cikavyja. Ja hladžu, prymoŭkli i našy starejšyja braty. Užo nie kryčać, što jany pasyłali hetych chłopcaŭ u Stambuł. Nijakaha Stambuła nie było i być nie mahło, jak akazałasia nasamreč. Jasna, što ŭ hetaj hrupy byli inšyja mety. I zadača śledstva — vyśvietlić hetyja mety», — zajaviŭ kiraŭnik dziaržavy.
Jon paprasiŭ z zatrymanymi abychodzicca akuratna. «Jany, viadoma, vinavatyja, ale nie nastolki, kab u dačynieńni da ich prymać niejkija žorstkija miery. Heta sałdaty. Im zahadali — jany pajšli. Raźbiracca treba z tymi, chto zahadvaŭ, chto ich pasyłaŭ siudy», — źviarnuŭ uvahu Alaksandr Łukašenka.
«Małajcy, što vyśvietlili, što heta pieršaja hrupa. Ja tak razumieju, heta tolki pieršaja hrupa z 180 abo 200 čałaviek, jakaja płanavałasia da pierakidańnia ŭ Biełaruś. I prytym, kali ja heta kažu (ja pračytaŭ dakład), heta dakładnyja źviestki siońnia. I sproba tam ciapier schavać «chvost» u Rasii i skazać, što voś ledź nie jany z nami ŭzhadnili pryjezd hetaj hrupy, heta poŭnaje hłupstva», — padkreśliŭ biełaruski kiraŭnik.
Jon rastłumačyŭ, što zaŭsiody, jakija b mierapryjemstvy ni pravodzilisia ŭ Biełarusi z udziełam rasijskich vajskoŭcaŭ, ci to byłych, ci to dziejučych, zaŭsiody adpaviednyja viedamstvy dźviuch krain uzajemadziejničajuć. «U nas dazvoł tolki prezident moža dać na pryjezd vajskoŭcaŭ, na naviedvańnie Biełarusi. Z technikaj, biez techniki, samaloty, viertaloty i hetak dalej… Nijakich dazvołaŭ nichto nie davaŭ. Bolš za toje, u nas siońnia vyklikajuć surjoznyja padazreńni tyja mety, jakija hrupa mieła», — skazaŭ kiraŭnik dziaržavy.
Łukašenka padkreśliŭ, što biełaruski bok adkryty dla ŭzajemadziejańnia pa situacyi, jakaja skłałasia: «Na chłuśni my palityku nie pabudujem. Pierakrykvajučy adno adnaho ŭ ŚMI, pytańnie nie vyrašym. Tamu, kali ŭ kahości jość žadańnie z rasijanaŭ atrymać dadatkovuju infarmacyju, my zaŭsiody adkrytyja. My ničoha nie chavajem, ale nam patrebna praŭda».
Alaksandr Łukašenka daŭ pažadańni ŭ dalejšaj pracy kampietentnych biełaruskich viedamstvaŭ. «Śledstva viadzie Śledčy kamitet, apieratyŭnaje supravadžeńnie — za vami [KDB] i milicyjaj. Padklučajcie ludziej, kali vam treba, apieratyŭnikaŭ. Pracujcie akuratna. Ale praŭda pavinna być pradjaŭlena hramadstvu», — adznačyŭ jon.
