Śledstva źviartaje ŭvahu na niestykoŭki ŭ pakazańniach zatrymanych u Biełarusi rasijan z pryvatnaj vajskovaj kampanii. Adpaviednyja fakty ŭ hutarcy z žurnalistami ahučyŭ staršynia Śledčaha kamiteta Biełarusi Ivan Naskievič, pieradaje BiełTA.
Kiraŭnik SK adznačyŭ, što asnoŭnaja masa faktyčnych abstavinaŭ składaje śledčuju tajamnicu. Tym nie mienš jon padzialiŭsia niekatorymi padrabiaznaściami. «Hałoŭnym śledčym upraŭleńniem centralnaha aparata Śledčaha kamiteta praciahvajecca aktyŭnaja faza rasśledavańnia kryminalnaj spravy, raspačataj 29 lipienia pa art. 13 i č. 2 art. 293 KK (Padrychtoŭka da masavych biesparadkaŭ). Padazravanymi pa hetaj kryminalnaj spravie pryznanyja 33 hramadzianiny Rasijskaj Fiederacyi, i jany zatrymanyja. 31 lipienia ŭ dačynieńni da ich śledstvam abranaja i prakuroram sankcyjanavanaja miera strymańnia ŭ vyhladzie źmiaščeńnia pad vartu», — skazaŭ Ivan Naskievič.
Jon taksama raspavioŭ, što źjaviłasia padstavaj dla padazreńniaŭ u dačynieńni da zhadanych rasijskich hramadzian. Dadzienaja hrupa zajechała na terytoryju Biełarusi ŭviečary 24 lipienia, nibyta majučy namier vylecieć rejsam ź Minska ŭ Stambuł. «Sa słoŭ častki padazravanych, rejsam u 10 hadzin 50 chvilin. Tym nie mienš, majučy dastatkovy resurs času dla rehistracyi na rejs i, adpaviedna, na vylet z krainy, usia hrupa prajšła mima aeraporta i zasialiłasia ŭ hatel IBB u Minsku», — adznačyŭ kiraŭnik SK.
Jakoje dačynieńnie da ŭsiaho hetaha mohuć mieć Cichanoŭski i Statkievič, jakija, pavodle raniejšych zajaŭ, taksama prachodziać pa spravie, Naskievič nie skazaŭ.
Pry hetym jon źviarnuŭ uvahu na toj fakt, što haścinica była zabraniravanaja zahadzia. «U toj ža čas było zarehistravana i zasialeńnie ŭ sanatoryj «Biełarusačka» ŭ Ždanovičach pad Minskam. Prabyŭšy sutki ŭ haścinicy IBB i nie palacieŭšy ŭ Stambuł, jak zajaŭlajuć padazravanyja (nie palacieŭšy ni 25, ni 26, ni 27 lipienia, choć miełasia takaja mahčymaść), usia hrupa pierajechała, paviedamiŭšy administracyju haścinicy IBB, što nibyta jeduć u aeraport dla vyletu z krainy. Tym nie mienš jany zasialilisia ŭ sanatoryj «Biełarusačka», — pryvioŭ fakty Ivan Naskievič.
Užo padčas pražyvańnia hrupy ŭ sanatoryi była atrymana i pravierana apieratyŭnymi słužbami infarmacyja ab znachodžańni tam adpaviednych asob. Pa sukupnaści atrymanaj infarmacyi ab dosyć padazronych pavodzinach hetych ludziej było pryniata rašeńnie ab zatrymańni, a paśla i raspačynańni kryminalnaj spravy.
«Akramia taho, dla paćviardžeńnia vysnoŭ ab dosyć dziŭnych pavodzinach hetych ludziej śledstvam zdabytaja infarmacyja z telefonaŭ zatrymanych ab tym, što jany čakajuć jašče niekalki hrup takich svaich kalehaŭ — hramadzian Rasijskaj Fiederacyi. Nami była atrymana infarmacyja i pra toje, što jany ŭsie praktyčna majuć surjoznaje bajavoje minułaje. Vajavali na ŭschodzie Ukrainy. Praktyčna ŭsie naležać da pryvatnaj vajennaj kampanii «Vahniera». Zrazumieła, što inšych rašeńniaŭ u dačynieńni da ŭsich hetych hramadzian, akramia jak zatrymańnie i pryniaćcie inšych pracesualnych mier, ułasna, nie mierkavałasia», — raspavioŭ Ivan Naskievič.
Akramia taho, pry vyvučeńni pierapiski ŭ stvoranym hetaj hrupaj čacie vyśvietlili, što ad staršaha hrupy była dadzienaja kamanda źniščyć razdrukavanyja elektronnyja kvitki na nibyta vylet ź Minska 25 lipienia.
«Padčas dopytaŭ jany dajuć samyja supiarečlivyja pakazańni. U pryvatnaści pra toje, što hrupa nibyta mieła namier vylecieć ź Minska ŭ Stambuł, kažuć mienš za pałovu ludziej. Astatnija pakazvajuć zusim inšyja punkty kančatkovaha vizitu — inšyja krainy, nie tolki Turcyju, — adznačyŭ kiraŭnik SK. — Što tyčycca tych, jakija nibyta lacieli ŭ Turcyju, u ich sapraŭdy hetak ža roznyja mety traplańnia ŭ hetuju krainu. Chtości lacieŭ zaharać, adpačyvać, chtości nibyta achoŭvać niejkija abjekty, a chtości ahledzieć sabor Śviatoj Safii».
Adkazvajučy na pytańnie ab najaŭnaści zbroi i śpiecsrodkaŭ u zatrymanych i pra toje, ci byŭ u hetych ludziej namier niejkim čynam zajmieć ich u budučyni, Ivan Naskievič skazaŭ: «My b taksama chacieli viedać, ci była ŭ ich zbroja, ci jość jana dzieści ŭžo na terytoryi krainy albo prybudzie paźniej. Kali b heta zbroja była kanfiskavana adrazu ž pry zatrymańni, vy ž razumiejecie, zusim inšy kantekst razmovy, zusim inšyja padazreńni».
Kiraŭnik SK taksama adkazaŭ na pytańnie, ci patrebnyja ŭ takoj situacyi niejkija dadatkovyja miery, akramia ŭžo pryniatych. «Vidavočna, z ulikam taho, što mahčyma źjaŭleńnie ŭ krainie i inšych asob, pra jakich sami zatrymanyja pišuć u svaich čatach (da 200 čałaviek), pravaachoŭnikami prymajucca ŭsie mahčymyja miery. U dziažurnyja častki orhanaŭ unutranych spraŭ užo pastupaje roznaja infarmacyja: dzieści kahości zaŭvažyli, niejkija, mahčyma, padazronyja ludzi. Jana akumulujecca, analizujecca. Pakul nichto dadatkova nie zatrymlivaŭsia».
