Cieła pamierłaha ad atrymanaha padčas akcyj pratestu 11 žniŭnia ahniastrelnaha ranieńnia hałavy bieraściejca Hienadzia Šutava paśla sudmiedekśpiertyzy addali rodnym. Pra heta TUT.BY paviedamiła dačka Hienadzia Anastasija Barančuk. Zaraz katafałk z trunoj Šutava nakiroŭvajecca ŭ Žabinku, tam jaho zaŭtra pachavajuć. Katafałk supravadžajuć bajkiery — Hienadź byŭ adnym ź ich.
U daviedcy ab śmierci Šutava skazana, što jaje niepasrednaj pryčynaj staŭ traŭmatyčny aciok hałaŭnoha mozhu. Heta było ŭstanoŭlena sudmiedekśpiertami padčas vykryćcia. Asnoŭnaja pryčyna śmierci — traŭmatyčnaje ŭnutrymazhavoje krovaźlićcio.
U dakumiencie taksama pakazvajecca kod źniešniaj pryčyny pa šyfry mižnarodnaj kłasifikacyi chvarob (MKB-10): Y22 - «paškodžańnie ŭ vyniku strełu z ručnoj ahniastrelnaj zbroi ź niavyznačanymi namierami». U hety błok MKB-10 uklučajucca vypadki, kali dastupnaj infarmacyi niedastatkova, kab ekśpierty mahli zrabić vysnovu ab tym, ci źjaŭlajecca dadzieny incydent niaščasnym vypadkam, samapaškodžańniem abo hvałtam z metaj zabojstva abo naniasieńnia paškodžańniaŭ.
