Śviatłana Cichanoŭskaja siońnia vystupała pierad jeŭrapiejskimi parłamientaryjami pa videasuviazi, jana začytała svoj zvarot ź Vilni, piša Tut.by.
— Siońnia maja kraina, Biełaruś, znachodzicca va ŭzrušeńni i kryzisie. Mirnych demanstrantaŭ niezakonna zatrymlivajuć, zaklučajuć pad vartu i źbivajuć. Ułady vykarystoŭvajuć taktyku zapałochvańnia, strachu i fizičnych pahroz. Prynamsi šeść čałaviek byli zabityja, dziasiatki ličacca źnikłymi bieź viestak. Heta adbyvajecca ŭ centry Jeŭropy. Ciapierašni kryzis adbyŭsia ŭ vyniku vybaraŭ 9 žniŭnia. Na dumku bolšaści naziralnikaŭ, vybarčy praces prajšoŭ z surjoznymi parušeńniami. Niekatoryja apanienty spadara Łukašenki, uklučajučy majho muža, uziatyja pad vartu pa nadumanych abvinavačvańniach. Inšyja vymušanyja byli źjechać praz strach pieraśledaŭ.
Cichanoŭskaja padziakavała ŭładam ES i partyjam Jeŭrapiejskaha parłamienta za ich pazicyju pa niepryznańni vynikaŭ vybaraŭ, jakija, pa jaje słovach, prajšli ź istotnymi parušeńniami. Pa jaje słovach, ciapier u Biełarusi pačałasia mirnaja revalucyja.
— My ŭžo nie apazicyja, zaraz my bolšaść. Adbyvajecca mirnaja revalucyja. Revalucyja ŭ Biełarusi nie hieapalityčnaja. Heta nie prarasijskaja i nie antyrasijskaja revalucyja, nie antyjeŭrapiejskaja i nie prajeŭrapiejskaja revalucyja. Heta demakratyčnaja revalucyja. Heta imknieńnie ludziej vyrašać samastojna. Heta imknieńnie ludziej svabodna i sumlenna abirać svaich lidaraŭ i vyznačać svoj los. Revalucyja ŭ Biełarusi niehvałtoŭnaja. Heta mirnaje imknieńnie ludziej da svabody, samavyznačeńnia i asnovam čałaviečaj hodnaści.
Cichanoŭskaja taksama zaklikała ŭsie krainy śvietu pavažać suvierenitet i terytaryjalnuju cełasnaść Biełarusi. Jana zajaviła pra svaju hatoŭnaść vieści dyjałoh ź ciapierašnimi ŭładami Biełarusi z metaj praviadzieńnia novych, sumlennych i prazrystych vybaraŭ, a taksama nahadała, što dla hetych metaŭ i było inicyjavana stvareńnie Kaardynacyjnaj rady.
— Naša meta — pravieści sumlennyja vybary mirna, šlacham dyjałohu. Takim čynam ja zajaŭlaju pra hatoŭnaść vieści dyjałoh z uładami.
My hatovyja pryznačyć pierahavorščykaŭ. My chočam razhledzieć pasiarednictva mižnarodnych arhanizacyj pa sadziejničańni dyjałohu. Kab sadziejničać u pierachodny pieryjad, ja stvaryła Nacyjanalnuju kaardynacyjnuju radu, jakaja ŭklučaje ŭsie słai biełaruskaj hramadzianskaj supolnaści i ŭsie baki palityčnaha śpiektru. Na žal, ułady adkazali pahrozami i zapałochvańniem ŭ dačynieńni da členaŭ rady, u tym liku łaŭreata Nobieleŭskaj premii Śviatłany Aleksijevič. Zapałochvańnie nie pracuje. My nie zdadzimsia. My patrabujem pavahi našych bazavych pravoŭ. My patrabujem vyzvaleńnia ŭsich palityčnych źniavolenych. My patrabujem spynić hvałt i zapałochvańnie z boku ŭładaŭ. Biełarusy zasłuhoŭvajuć lepšaha, Jeŭropa zasłuhoŭvaje lepšaha, — skončyła svoj vystup Śviatłana Cichanoŭskaja.
