Patryjaršym ekzarcham usiaje Biełarusi, mitrapalitam Mienskim i Zasłaŭskim pryznačany jepiskap Barysaŭski i Marjinahorski Vieńjamin. Pra heta siońnia paviedamiŭ kiraŭnik pres-słužby RPC Uładzimier Lahojda.
Takoje rašeńnie pryniaŭ Śviaty Synod Ruskaj pravasłaŭnaj carkvy na pasiadžeńni ŭ aŭtorak u Maskvie
Mitrapalit Pavieł pryznačany kiraŭnikom kubanskaj mitrapolii, papiaredni kiraŭnik katoraj pamior 8 žniŭnia ad uskładnieńniaŭ paśla karanavirusa.
Paśla prezydenckich vybaraŭ mitrapalit Pavał zajaviŭ na sustrečy ź viernikami, što škaduje pra zaŭčasnaje vinšavańnie Alaksandra Łukašenki ź pieramohaj, a 17 žniŭnia jon naviedaŭ źbitych AMAPam pratestoŭcaŭ u lakarni chutkaj medycynskaj dapamohi ŭ Miensku.
Svaboda sabrała niekatoryja fakty pra novaha kiraŭnika BPC RPC.
Pieršy biełarus na pasadzie kiraŭnika Biełaruskaha ekzarchatu RPC
Jepiskap Barysaŭski i Marjinahorski Vieńjamin (Tupieka Vital Ivanavič) naradziŭsia 16 vieraśnia 1968 hoda ŭ Łunincy Bieraściejskaj vobłaści.
«Inžyner-radyjofizyk»
Paśla zakančeńnia siaredniaj škoły № 1 u Łunincy ŭ 1985 hodzie pastupiŭ u Biełaruski dziaržaŭny ŭniversytet na fakultet radyjofizyki i elektroniki. Słužyŭ u armii. U červieni 1992 hodu atrymaŭ dyplom pa specyjalnaści «inžyner-radyjofizyk».
Pastryžany ŭ Žyrovickim manastyry
U žniŭni 1992 hodzie pačaŭ vučobu ŭ Mienskaj duchoŭnaj seminaryi, ale paśla treciaha kursu padaŭ prašeńnie i byŭ pryniaty ŭ lik bracii Uśpienskaha Žyrovickaha mužčynskaha manastyru.
U 1994 hodzie byŭ pastryžany ŭ manastva ź imiem Vieńjamin.
Jepiskap Barysaŭski
Rašeńniem Śviatoha Synodu ad 5 sakavika 2010 hoda vybrany jepiskapam Barysaŭskim, vikaryjem Mienskaj eparchii.
Kiravaŭ Vydavieckaj radaj Biełaruskaha ekzarchatu i Synadalnym adździełam relihijnaj adukacyi i katechizacyi, byŭ namieśnikam staršyni carkoŭnaha sudu Biełaruskaha ekzarchatu.
Kryž Eŭfrasińni i premija Łukašenki
Adznačany šeraham carkoŭnych uznaharodaŭ, u tym liku ordenam Kryža Eŭfrasińni Połackaj, ordenam Kiryły Turaŭskaha, a taksama śvieckimi ŭznaharodami: premijaj prezydenta Respubliki Biełaruś «Za duchoŭnaje adradžeńnie» i znakam Ministerstva ŭnutranych spravaŭ «Za sadziejničańnie».
