Rasieja pryznaje prezidenckija vybary lehitymnymi, a Alaksandra Łukašenku — ich pieramožcam. Pra heta prezident RF Uładzimir Pucin zajaviŭ u intervju, što tranślavałasia ŭ efiry prahramy «Viestki ŭ subotu» ź Siarhiejem Brylovym na telekanale «Rasija-1», piša TASS.
«My zychodzim z taho, što vybary adbylisia. Ja adrazu heta zrabiŭ, my pryznali ich lehitymnaść, i, jak vy viedajecie, ja pavinšavaŭ Alaksandra Ryhoraviča Łukašenku ź pieramohaj na hetych vybarach», - skazaŭ Pucin.
Admova pradstaŭnikoŭ Biuro pa demakratyčnych instytutach i pravach čałavieka (BDIPČ) ABSIE pryjechać na vybary ŭ Biełaruś daje padstavu padazravać, što pazicyja Zachadu ŭ dačynieńni da hetaha pracesu była zahadzia padrychtavanaja, ličyć prezident RF. «Biełaruskija ŭłady zaprasili BDIPČ ABSIE pryniać udzieł u kantroli nad vybarami. Čaho ž jany nie pryjechali? Heta adrazu nas navodzić na dumku ab tym, što ŭžo była, ułasna kažučy, narychtavanaja pazicyja pa vynikach hetych vybaraŭ», - skazaŭ jon.
Na dumku rasijskaha lidara, chtości moža sumniavacca ŭ vynikach biełaruskich vybaraŭ, adnak «ničoha idealnaha ŭ śviecie nie isnuje, ni ŭ palitycy, ni ŭ ekanomicy, ni ŭ sacyjalnaj śfiery». «Navat u pryrodzie niama ničoha idealnaha, choć heta najbolš daskanałaja boham stvoranaja śfiera», — dadaŭ jon.
«U mianie jość usie padstavy sumniavacca ŭ tym, što tyja, chto sumniavajecca, byli absalutna sumlennyja», - zajaviŭ rasijski lidar
