U padziejach, jakija adbyvajucca ciapier u Biełarusi, prasočvajucca prykmiety hibrydnaj vajny, zajaviŭ u prahramie «Hałoŭny efir» na telekanale Biełaruś-1» načalnik Navukova-daśledčaha instytuta Uzbrojenych Siłaŭ Biełarusi Viktar Tumar, piša tut.by.
Viktar Tumar. Fota: pres-słužba Ministerstva abarony
Dla pieramohi ŭ infarmacyjnaj vajnie z sučasnych realijach nieabchodna zachapić śviadomaść ludziej z dapamohaj telebačańnia i internetu, ličyć Tumar.
— Blizu 95% ludziej, uzrost jakich da 30 hadoŭ, karystajucca hetym internetam, i jany, jak havorycca, źjaŭlajucca «palivam revalucyi», — skazaŭ jon.
Kiraŭnik NDI zajaviŭ, što ŭ Biełarusi prasočvajucca prykmiety hibrydnaj vajny.
— My bačym, što ŭ nas u sapraŭdny momant idzie destruktyŭnaje infarmacyjnaje ŭździejańnie na nasielnictva. Śviadomaść nasielnictva paviernutaja ŭ bok procidziejańnia ŭładam, choć jany zabyvajuć, što našy ŭłady, tyja ludzi, jakija słužać u siłavych strukturach i dziaržorhanach, jany taksama hramadzianie Respubliki Biełarusi i taksama žadajuć dabra, — ličyć Tumar.
Na dumku kiraŭnika NDI, ludzi nie razumiejuć, što imi kirujuć.
— Kali zachapili śviadomaść hramadzian z dapamohaj telehram-kanałaŭ, u jakich aśviatlałasia niehatyŭnaja infarmacyja suprać siłavikoŭ, suprać dziaržsłužačych, suprać žurnalistaŭ, nie kažučy pra toje, što nieabchodna zrabić, kab hety niehatyŭ prybrać, paśla hetaha jany ŭklučyli peŭnaje kiravalnaje ŭździejańnie, — zajaviŭ vajskoviec.
Jon pravioŭ anałohii pamiž akcyjami pratestaŭ u Biełarusi z revalucyjami ŭ Jehipcie.
— A paśla taho jak pierajšli da etapu mirnych pratestaŭ, my ŭbačyli dziaŭčat z kvietkami, jakija vychodziać na vulicy. I znoŭ ža — hety pryjom upieršyniu byŭ užyty na Kubie ŭ 2003 hodzie, potym paŭtaraŭsia ŭ inšych krainach, naprykład u Vieniesuele (nasamreč nie — dziaŭčaty z kvietkami źjavilisia ŭpieršyniu ŭ ZŠA padčas demanstracyj suprać vajny ŭ Vjetnamie — zaŭv. TUT.BY), — zajaviŭ Tumar.
Jon taksama ŭspomniŭ uskładańnie kvietak ambasadarami Jeŭraźviaza na miescy hibieli ŭdzielnika pratestu Alaksandra Tarajkoŭskaha.
— Dakładna taki ž chod vykarystoŭvaŭsia va Ukrainie, na Jeŭramajdanie pry razdačy piražkoŭ. Našymi ludźmi stała lohka kiravać, — zajaviŭ jon.
Na dumku Tumara, dziejańniami ŭ Biełarusi kirujuć prafiesijanały, «tamu jany i nieprykmietnyja», a ludzi pamylajucca, ličačy, što samastojna vychodziać na mirnyja pratesty.
Kiraŭnik Navukova-daśledčaha instytuta Uzbrojenych Siłaŭ ličyć, što dla abarony ad destruktyŭnaha ŭździejańnia na nasielnictva ŭ internecie efiektyŭnyja FM-radyjo i ŭlotki ŭzoru Vialikaj Ajčynnaj vajny.
— Da hetaha času mianie ŭražvajuć tyja płakaty, tyja zakliki, jakija byli stvorany ŭ čas Vialikaj Ajčynnaj vajny. Vy pahladzicie, jakoje ŭražańnie jany stvarajuć, my nie pavinny ad hetaha admaŭlacca.
