Navučency i vypuskniki fakulteta fiłasofii i sacyjalnych navuk Biełaruskaha dziaržaŭnaha ŭniviersiteta ŭ adkrytym liście vykazali svajo spačuvańnie ŭsim zatrymanym i paciarpiełym padčas mirnych akcyj pratestu pradstaŭnikam vyšejšych navučalnych ustanoŭ Biełarusi, a taksama zapisali videa, na jakim čytajuć vierš Janki Kupały «A chto tam idzie?». U adkrytym zvarocie — bolš za 400 proźviščaŭ. 

«Vyšejšaja adukacyja sama pa sabie niepaźbiežna pavyšaje krytyčnaść myśleńnia. Heta jakaść nieabchodna dla śpiecyjalistaŭ, jakich rychtuje ŭniviersitet, i jano nie moža isnavać tolki ŭ miežach vučebnaj aŭdytoryi, ale zaŭsiody raspaŭsiudžvajecca na ŭsie śfiery žyćcia adukavanaha čałavieka. Svaboda myśleńnia, svaboda dumki i vykazvańni taksama źjaŭlajucca nieadjemnymi rysami ŭniviersiteta, i ŭsiaki zamach na ich viadzie da źniščeńnia vyšejšaj adukacyi i navukovaj dziejnaści naohuł. Ni navučalny praces, ni navukova-daśledčaja dziejnaść niemahčymyja pad prymusam i ŭ atmaśfiery strachu, jakaja zusim paralizuje intelektualnuju aktyŭnaść», — nahadvajuć aŭtary zvarotu. 

I siłavoje reahavańnie na hałosnaje vykazvańnie svajoj pazicyi studentami abo supracoŭnikami ŭniviersitetaŭ — biezumoŭna razburalnaja źjava, nastupstvy jakoj usim ciažaram lahuć na budučyniu našaj krainy, pierakananyja vykładčyki, studenty i vypuskniki fakulteta. 

U śviatle vyšejskazanaha zaklikajem Ministerstva adukacyi i administracyi ŭniviersitetaŭ Respubliki Biełaruś:

- źviarnucca da Ministerstva ŭnutranych spraŭ i inšych siłavych struktur Respubliki Biełaruś z zaklikam spynić uvarvańnie na terytoryju navučalnych ustanoŭ i ŭmiašańnia ŭ navučalny praces, spynić usialakija prajavy žorstkaści pa adnosinach da supracoŭnikaŭ i navučencaŭ na terytoryi navučalnych ustanoŭ, taksama padčas mirnych akcyj pratestu;

— zabiaśpiečyć abaronu supracoŭnikaŭ i studentaŭ, vyklučyć mahčymaść pahroz, prymusu i hvałtu z boku pradstaŭnikoŭ siłavych struktur u dačynieńni da supracoŭnikaŭ i navučencaŭ u ścienach navučalnych ustanoŭ;

— adkryta vystupić u abaronu akademičnych i hramadzianskich svabod i asudzić usiaki hvałt na terytoryi ŭniviersiteta i za jaho miežami.

Aŭtary zvarotu nieadnarazova zaklikali da pieramoŭ administracyju fakulteta fiłasofii i sacyjalnych navuk BDU, kab publikavać dadzieny list na staroncy fakulteta, adnak administracyja admoviłasia ad takoha kroku. 

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?